Terça, Maio 21, 2024
Total visitors: 766366

Diretora Asosiasaun Chega Ba Ita (ACbit), Maria Manuel Leong Pereira, hateten feto barak mak sai vítima violénsia seksuál durante 24 anos tempu rezisténsia nia laran, maibé barak mak seidauk hetan rekoñesimentu husi Estadu Timor-Leste liuhusi apoiu ruma hodi hadia sira-nia moris.

Diretora Asosiasaun Chega Ba Ita (ACbit), Maria Manuel Leong Pereira, hateten feto barak mak sai vítima violénsia seksuál durante 24 anos tempu rezisténsia nia laran.

“Feto sira ne’ebé sai vítima ba iha violénsia seksuál iha tempu rezisténsia nian ne’ebé lakon sira-nia dignidade, lakon família, no sira mós lakon sira-nia mentalidade psikolojia maibé seidauk hetan rekoñesimentu husi Estadu,” Diretora Acbit Pereira hatete durante serimónia lansamentu livru ho títulu “Feto Sira-Nia Asesu ba Justisa Tranzitóriu iha Timor-Leste” iha salaun Centro Nacional Chega (CNC), Balide, Díli.

Nia hatutan, ACbit servisu hamutuk ho CNC atu haree liuba iha vítima sira ne’ebé maka sofre ba iha violénsia seksuál, maibé sira tauk ko’alia sai saida mak sira sente durante ne’e.

“Durante ne’e ACbit ho CNC haree liuba iha vítima sira ho objetivu atu iha futuru mai labele akontese tan violénsia seksuál hanesan iha tempu rezisténsia nian. Feto sira ne’ebé sai vítima, ami hasoru no haforsa sira ho di’ak, nune’e sira bele iha mentalidade hodi ko’alia sai liafuan saida de’it maka sira atu ko’alia sai,” hatutan nia.

Iha fatin hanesan, Diretór UNTL Human Rights Center, Armindo Maia hatete sira mós harakak haree liubá ba justisa tranzitória ne’e importante tebes, tanba ne’e ko’alia liuba feto barak ne’ebé sai hanesan vítima ba violénsia seksuál iha tempu pasadu liuliu durante tempu rezisténsia Timor-Leste nian, no elabora ona sai livru ida.

“Livru ne’e [Feto Sira-Nia Asesu ba Justisa Tranzitóriu iha Timor-Leste] importante tebes, tanba peskiza ne’e haree liuba iha feto barak maka sai vítima ba violénsia seksuál iha tempu rezisténsia nian maibé vitama ida ka rua hanesan ne’e mak foin hetan asisténsia, maibé barak maka seidauk hetan justisa loloos,” nia dehan.