- Publika iha: 29 Dezembro 2023
Sekretáriu Estadu Protesaun Sivil (SEPS) husu Ministériu Edukasaun (ME) atu integra matéria redusaun risku dezastre naturais ba kurríkulu eskolár.
"Ami koordena ho Ministériu Edukasaun no husu atu integra matéria risku dezastre naturais ba iha kurríkulu eskolár, tanba estudante sira mak sai fatór importante ba prevensaun dezastre," SEPS Araújo dehan iha Timor Plaza, Díli.
Nia dehan, presiza hasa'e koñesimentu komunidade nian kona-ba jestaun risku dezastre liuhusi edukasaun, tanba mínimu estudante hatene kauza dezastre, sinais dezastre no oinsa atu prevene dezastre.
Nia dehan, liuhusi eskola bele disemina informasaun ba komunidade eskolár sira, nune'e sira bele transmite fali ba inan-aman no komunidade kona-ba oinsa jestaun redusaun risku dezastre.
"Ami iha ona komunikasaun ho Ministériu Edukasaun oinsa atu bele tau matéria redusaun dezastre ba kurríkulu eskolár hodi hanorin ba estudante sira," nia informa.
Entretantu, Ministra Edukasaun Dulce de Jesus Soares dehan, matéria ne’ebé importante presiza implementa iha eskola hodi hanorin ba estudante sira, tanba sira mak futuru nasaun nian.
"Atu inklina matéria redusaun risku dezastre naturais iha kurríkulu ita sei tur hamutuk ho parseru sira hodi halo revizaun ba kurríkulu nune'e bele inklina tan matéria refere ba kurríkulu," nia dehan.
Enkuantu nia dehan, loos katak iha ona koordenasaun no komunikasaun entre Ministériu Edukasaun no Sekretáriu Estadu Protesaun Sivil SEPS no servisu kooperasaun sei kontitua la’o nafatin.