2024 Ema ho Defisiensia Na’in 22 Asesu ba Estudus Superior Iha UNTL

Asosiasaun Defisiénsia Timor-Leste (ADTL) halo kooperasaun ho Ministéru Ensinu Superior, Siénsia no Kultura (MESSK) hodi liuhusi rejime espesial, ema ho defisensia na’in 22 asesu estudus nivel superior iha Universidade Nasional Timor Lorosa’e (UNTL).

Agosto Soares, nudar estudante rejime espesial refere sente kontente tanba bele hetan oportunidade husi ADTL hodi asesu estudus nivel superior iha UNTL.

“Sim ha’u nu’udar estudante bolseru sente kontente tebes. Ha’u hetan defisiénsia husi isin lolon parte tilun nian. Ha’u hetan oportunidade eskola ajuda husi ADTL,” dehan nia via WhatsApp.

Iha sorin seluk Diretór ADTL, Cezario da Silva, hateten sira nia papel ida mak asegura ema ho defisiénsia hodi asesu ba iha edukasaun, hahu husi nivel basiku to’o iha nivel superior.

“Liu husi rejime espesial ne’ebé mak ita ho MESSK halo kooperasaun, oportunidade ida ne’e hahú husi 2020. Períodu sira liuba ema husi defisiensia inklui ema hirak ne’ebé servisu no tau matan ba ema defisiensia liu husi rezime ida ne’e. Ba tinan ida ne’e, foku de’it ba ema ho defisiénsia, nune’e ami rejista ema na’in 22. Ema hirak ne’e mai husi membru ADTL nian,” dehan Diretór Silva.

Nia salienta tan katak ema ho defisiénsia tipu 3 mak asesu ba iha rejime espesial, inklui defisiénsia fisiku kuaze ema na’in 10, defisiénsia matan na’in 10, no defisiénsia tilun na’in 2.

Nia mos husu ba ba estudante defisiente sira ne’ebé hetan oportunidade, kontinua sira-nia estudu ho diak,tanba oportunidade hodi sai nafatin estudante ezemplár maské hasoru dezafiu fizikamente, asesibilidade, no limitasaun seluk oin oin.

“Oportunidade ida ne’e diak loos, tanba ne’e ami rekomenda atu kontinua sai ezemplár maské iha dezafiu iha UNTL. Tenke obriga an atu kontinua estuda no kontinua hola parte iha movimentu sira iha universidade hodiaprende ho kolega sira seluk,” nia hatutan.

Diretór ADTL ne’e mós rekomenda ba UNTL mellora espasu sira ba ema ho defisiénsia sira senti livre no seguru hodi halo estudu iha UNTL no dosente sira mós presiza hadia liutan koñesimentu ba lian jestuál.