Domingo, Abril 21, 2024
Total visitors: 766366

Presidente Concelho de Imprensa de Timor-Leste (CI), Otelio Ote hateten sorumutu entre ekipa g7+ ho reprejentante institusaun media nasionál no asosiasaun jornalista sira atu fahe esperensia no hanoin ba malu oinsa promove demokrasia, paz no estabilidade iha nivel nasionál no internasionál.

Presidente Concelho de Imprensa de Timor-Leste (CI), Otelio Ote hateten sorumutu entre ekipa g7+ ho reprejentante institusaun media nasionál no asosiasaun jornalista sira atu fahe esperensia no hanoin ba malu oinsa promove demokrasia, paz no estabilidade iha nivel nasionál no internasionál.

Nia dehan objetivu sorumutu ida ne’e, organizasaun g7+ fahe informasaun konaba misaun-vizaun no servisu advokasia ne’ebé sira halao hodi promove paz no estabilidade iha nivel nasionál no mundial ba jornalista sira atu iha koñesementu.

“Ita hatene ita nia jornalista Timor oan sira maioria la remata estudu iha universidade la hola espesialidade konaba asuntu entau aktividade ne’e presiza halo beibeik atu eleva sira nia kapasidade teknika, profesional no intelektual,” nia hateten bainhira halo abertura ba forum editorial iha edifisiu sekretariadu jeral g7+ Colmera, Dili.

Nai hateten forum editorial ne’e nudar atividade regular ne’ebé sei fasilita institusaun oioin fahe informasaun ba jornalista sira atu hasa’e sira nia koñesementu ba asuntu oioin.

Entretantu, Adjuntu Sekretario Jeral g7+, Habib Urrehman Mayar hateten sorumutu ne’e importante tebes ba sira atu fahe informasaun konaba sira nia servisu ba jornalista sira no rona mos jornalista sira nia hanoin atu hamutuk promove paz no estabilidade.

“Hau espera enkontru ohin loron bele fo oportunidade atu fahe informasaun no rona husi media sira oinsa ita promove g7+ no objetivu global organizasaun atu promove paz, estabilidade no dezenvolvimentu iha Timor-leste tanba media iha papel importante hodi promove demokrasia, paz no estabilidade,” nia hateten.

Nia dehan Timor-Leste nasaun ne’ebe iha liberdade imprensa diak tebes iha mundu, entau bele aproveita demokrasia no liberdade ne’ebé iha promove paz no estabilidade iha rai laran ba mundu tanba iha mundu ema lahatene dezenvolvimentu ne’ebé lao.

Nia informa g7+ mak organizasaun intergovernmental ne’ebé hari iha dia 10 fulan-abril tinan 2010 iha Dili, Timor-Leste. No organizasaun ne’e halibur hamutuk nasaun 20 hanesan Afghanista, Burundi, Central African Republic, Chad, Comoros, Cote d’lvoire, Democratic Republic of Congo, Guinea, Guinea Bissau, Haiti, Liberia, Papua New Guinea, Solomon Island, Sao Tome and Principe, Sierra Leone, Somalia, South Sudan, Timor-Leste, Togo no Yemen ne’ebé afeta husi konflitu no frajilidade no mos iha tranzisaun ba iha reziliensia.

Iha parte seluk, Presidente Asosiasaun Jornalista Timor-Leste Press Union (TLPU), Candido Alves hateten media iha papel importante ba promove demokrasia, paz no estabilidade, maibe seidauk iha atensaun ne’ebé diak ba institusaun media sira.

“Hau sempre hateten katak bainhira ema ida koalia ho jornalista ida nia koalia ba mundu, maibe iha Timor ladun tau importansia ba media tanba sa, bainhira ita presiza faktu ruma ema balun la fo sai faktu sira ne’e ba jornalista sira,” nia hateten.

Nia espera ba oin institusaun hotu-hotu bele nakloke ba jornalista sira tanba paz no estabilidade iha bainhira iha lia loos no justisa.