- Publika iha: 09 Fevereiro 2024
Diretóra Jeral Servisu Imigrasaun Inspetora Xefe Polisia Adelaide da Rosa informa iha fulan-janeiru tinan 2024, sira emite autorizasaun residensia permanente ba sidadaun estranjeru na'in 22 ho klasifikasaun kaben mistu no ba kompañia (empregador) na'in tolu.
Nia dehan emisaun autorizasaun residensia permanente ba kompañia, sira halo selesaun ne’ebé rigor tebes tuir prosedura ne’ebé iha katak kompañia submete pedidu mai ekipa halo verifikasaun hare kompañia ne’e fo servisu ba ema nain hira no durasaun tempu iha Timor atu garantia prense duni rekejitu tuir lei.
“Iha fulan ida ne’e nia laran ita emite maioria kaben mistu hamutuk ema na'in 22,” nia hateten iha servisu fatin Caicoli, Dili.
Nia hateten sira mos emite autorizasaun residensia temporariu nian ba ema na'in 157, kompostu husi kaben mistu ema na'in 49, kompañia 100 no misionariu na'in 8. Alende ne’e halo mos emisaun ba estadu espesial ba ema na'in 124, ne’ebé emite bazea ba koperasaun servisu entre nasaun rua ho durasaun tempu tuir kontratu ne’ebé iha.
Nia hatutan emisaun ba misionariu no estadu espesial hanesan asesor sira no tekniku apoia servisu estadu nian la kobre kustu.
Nia haktuir iha fulan-janeiru tinan 2024, rejista ema tama mai teritorio nasionál hamutuk na'in 22766 no ema ne’ebé sai husi teritorio hamutuk na'in 21736, signifika total movimentu ema sai no tama hamutuk na'in 44502.
Nia informa iha tinan 2024, sira halo rekrutamentu ba funsionariu foun ba servisu imigrasaun nian hamutuk na'in 100 tanba sira halo ona nomeasaun ba adidu servisu sira iha embaixada no konsuladu sira iha rai liur hanesan Sigapura, Bijin, Portugal, Jakarta, Bali, Atambua ho objetivu atu bele halo emisaun no autorizasaun ba iha vistu ne’ebé sidadaun estranjeru sira utiliza hodi tama mai teritorio nasionál.
Iha parte seluk, Diretór Organizasaun Fundasaun Mahein, Nelson Belo hateten nesesariu tebes atu halo rekrutamentu ba rekursu umanu hodi fortifika servisu imigrasaun tanba frontera internasionál sira liu-liu rai ketan no tasi ne’e luan tebes pessoal la to’o.
“Ami husu beibeik ona ba governu atu halo rekrutamentu ba pessoal imigrasaun atu halao sira nia knar tanba demanda ne’ebe bo’ot liu husi rai maran, tasi no lalehan nian. Agora ita nia aeroportu internasionál Presidente Nicolau Lobato deit mak funsiona, maibe futuru aeroportu Suai no Oecusse funsiona tan mak presiza desloka tan pessoal imigrasaun sira ba iha ne’eba, nune’e mos iha portu sira,” nia hateten.
Nia hateten presiza mos tau pessoal imigrasaun iha Singapura, Darwin-Australia, Bali, Kupan, Atambua –Indonesia atu kordena ho servisu imigrasaun nasaun sira ne’ebe sai odamatan ba tama no sai.
Nia hatutan importante mos roforsa formasaun sira ne’ebé adapta ba demanda global nian hodi nune’e pessoal sira mos apar ho lalaok krime mundial atu sira iha abilidade responde ba kazu krime ruma akontese iha aeroportu internasional hanesan krime trafiku umanu.
Konaba emisaun autorizasaun residensia permanente, diretór haktuir politika nasionál koalia residensia permanente ne’e ba ema sira ne’ebé prense kriteria, liu-liu ema sira ne’ebé iha relasaun istoriku ba luta libertasaun no iha interese politika nian.