- Publika iha: 29 Agosto 2011
Relasiona ho joventude barak mak ohin loron seidauk hetan servisu tanba sei menus kapasidade,Diresaun Nasionál Empregu (DNE) pronto atu ajuda hodi kapasita sira ho formasaun oin-oin ne’ebé bele aumenta sira nia kapasidade.
Tuir Diretór Nasionál Empregu, Paul Alves, katak sentru empregu harii atu hare kestaun empregu nian liu ba sira ne’ebé rejistu hodi buka formasaun professional, servisu iha railaran no liur inklui formasaun emprezarial nian.
”Iha rejistu, ami iha formuláriu ne’ebé mak iha perguntas balun ne’ebé mak husu ba ak formasaun profesionál ami refere ba iha diresaun formasaun profesionál para sira bele tuir formasaun iha sentru formasaun profesionál,” hateten Diretór DNE Paul Alves, semana kotuk iha Balide,Dili.
“Se sira buka formasaun mikro emprezariál, ami iha departamentu auto empregu atu promove juventude sira ne’ebé mak iha hanoin atu loke sira nia negósiu maibé departamentu ne’e serbisu hamutuk ho Ministériu Ekonomia no Dezenvolvimentu ba labarik sira ne’ebé rejistu prefere ba iha ne’eba atu tuir formasaun emprezariál no submete sira bele hetan apoiu kiik-oan husi Governu para sira bele jere sira nia atividade rasik,”nia dehan.
Tuir nia, ba sira ne’ebé mak hakarak rejistu ba servisu iha rai liur hanesan Korea sira tenke mínimu akaba eskola sekúndária no tuir formasaun kursu lian Koreia durante fulan 6 depois tuir ezame mak bele ba.
No oras ne’e daudaun Governu Sekretariu Estadu Formasaun Profesional e Empregu (SEFOPE) konsege haruka ona Timor oan hamutuk 517 hodi ba servisu iha Koreia tuir dadus 2010 nian,no tuir planu iha 9 Agostu sei haruka tan jovens na’in 3 ba iha atu servisu iha area fabrika nian.
Entretantu Diretór Ezekutiva Forum Comunicação Juventude (FCJ) Oratóriu Don Bosco, Cipriano Oliveira hateten nia parte pronto atu atende jovens sira ne’ebé mak dezempregu “liu-liu sira ne’ebé risku ami fo sira kursu hanesan kursu Inglesh, no aprende analfabetizasaun e mós halao atividade internal,”.
Enkuantu tuir Sekretariu Estadu Joventude e Desportu, Miguel Manetelo, katak la’os la fo oportunidade ba joven sira maibé tenke sira mak promove aan “hatudu prestasaun ne’ebé diak bele reprezenta nasaun no compete iha jogus nasionál no internasionál nian,” nai dehan.