Terça, Maio 21, 2024
Total visitors: 766366

Espesialista ba moras mentál iha Hospital Nacional Guido Valadares (HNGV), iha Dili, Doutór Gaspar Pereira Quintão, hateten agora dadaun moras depresaun no ansiedade nia númeru pasiente sira kontinua aumenta iha Timor-Leste.

Espesialista ba moras mentál iha Hospital Nacional Guido Valadares (HNGV), iha Dili, Doutór Gaspar Pereira Quintão, hateten agora dadaun moras depresaun no ansiedade nia númeru pasiente sira kontinua aumenta iha Timor-Leste.

Nia dehan, moras depresaun no ansiedade nia tratamentu hanesan, maibé sintoma mak la hanesan, no moras rua ne’e bele hetan tratamentu, bainhira pasiente sira-ne’e ba halo tratamentu iha ospitál.

“Moras rua ne’e iha nia tratamentu, mak biolojia ne’ebé presiza ai-moruk antidepresaun nomós anti ansiedade, ne’e para ajuda sira. Durasaun atendimentu presiza fulan neen to’o tinan ida mak bele rekupera. Sira tenke tratamentu fiziku, terapia ne’ebé mak psikolojia tenke halo akonsellamentu ou konseling ba pasiente sira atu nune’e labele ta'uk demais,” nia dehan iha salaun JL-Vila, Fatuhada, Díli.

Nia dehan, moras depresaun mai ho sintoma mak hanesan hanoin barak ou triste ruma bele to’o semana rua, no ema ne’e dala ruma lakon tiha interese ba buat ne’ebé sira halo loron-loron, bele mós akontese sira komete suisidiu. Enkuantu moras ansidente ne’e mai ho sintomas mak hanesan ta'uk, mate, bulak no moras mental seluk, fuan tuku tuku, liman ain maten hotu, dada iis arraska, mezmu sira ba buka tratamentu maske moras la iha.

Nia apela ba komunidade sira katak, daudaun ne’e iha HNGV no iha sentru saúde sira iha munisípiu iha ona doutór espesialista ka enfermeiru ba psikolójika sira, tanba ne’e bainhira iha komunidade sira balun mak hetan problema depresaun no ansiedade, sira bele ba sentru saúde hodi halo diagnóstiku no tratamentu ba moras sira-ne’e.

Iha parte seluk, Psychosocial Recovery and Development in East Timor (PRADET) nia Koordenadór Programa Asisténsia Moras Mentál, Nicolau Vicente Ximenes hateten, agora dadaun sira fó asisténsia ba maluk sira ne’ebé iha moras depresaun ka sira ne’ebé moras mentál, hodi ba halo tratamentu iha sentru saúde.

“Ita halo komunikasaun ho sira-nia família hodi kolabora ho família no pesoál saúde sira atu hodi ba halo tratamentu iha fasilidade saúde, sira atu bele hetan tratamentu, depois dé hetan tratamentu ita-nia maluk sira ne’e iha sintomas mudansa ba iha ninia kondisaun mentál, entaun muda fali sira ba hamutuk ho família,” nia dehan.

Nia hatutan, agora dadaun ekipa husi PRADET sei kontinua ba haree ema sira-ne’e halo tratamentu halo kolabora ho família sira, atu pasiente sira ne’e bele ba halo nafatin tratamentu ho regulár kada semana ka kada fulan iha uma, no família sira mós tenke tau konsiderasaun no apoia ba sira nia membru família liuliu kontrola tratamentu ba sira no evita atu halo stigma no diskriminasaun ba sira.