Terça, Maio 21, 2024
Total visitors: 766366

Sekretáriu Estadu Protesaun Sivíl (SEPS) konsegue halo ona apoiu emerjénsia ba populasaun afetadu ba evikasaun ho tipu 5 inklui ferik, katuas, inan fó susu, inan isin-rua, no difisiente sira hamutuk na’in 98.

Sekretáriu Estadu Protesaun Sivíl (SEPS) konsegue halo ona apoiu emerjénsia ba populasaun afetadu ba evikasaun ho tipu 5.

SEPS Mariano Soares dehan, iha semana hirak ba kotuk ne’e, iha komunidade barak mak afetadu husi evikasaun ne’ebé Sekretáriu Estadu Assuntu Toponomia no Organizasaun Urbana no Predizente Autoridade halo iha kapital Díli laran.

“Ida-ne’e la’ós prekupasaun ema ida nian maibé ita hotu nian, tanba ne’e, governu liuhusi Sekretáriu Estadu Protesaun Sivíl apoiu pakote emerjénsia ba vítima iha tipu 5 hamutuk 98 kompostu husi ferik, katuas, inan fo susu, inan isin rua no ema ho kondisaun difisiente,” nia hatete.

Nia dehan, apoiu emerjénsia ne’ebé SEPS apoiu ne’e inklui item non food (material) no food (hahan).

“Ita halo apoiu solidaridade, tanba bainhira vítima sira oferese sira-nia fatin hodi halo evikasaun, sira mós kontribui ba prevensaun inundasaun. ne’e kauza husi uma balun ne’ebé mak rabat malu no la fó espasu ba bee atu halai hodi hamosu inundasaun,” SEPS Soares informa iha knaar fatin Kaikoli, Díli.

Iha parte seluk, Diretora Ezekutiva FOKUPERS (Forum Komunikasaunba Feto Timor-Leste), Maria Fatima Pereira dehan, sira nafatin apoiu ba iha planu governu nian ne’ebé mak hakarak atu halo Díli bonita, maibé se di’ak liu molok sidade Díli bonita presiza atu halo nia povu nia kondisaun bonita uluk.

“Ha’u hanoin instituisaun estadu nian hotu presiza haree fila fali rekomendasaun CEDAW nian ne’ebé mak komite CEDAW haruka mai iha estadu Timor-Leste liu-liu kona-ba evikasaun ninian,” nia dehan.

Nia dehan, se bainhira estadu atu halo evikasaun estadu presiza kria kondisaun, mekanismu ne’ebé di’ak ba iha ninia sidadaun sira molok halo evikasaun.

“Estadu presiza halo fali refleksaun ba rekomendasaun CEDAW nian, tanba kada periodu ita halo rekomendasaun ne’ebé hanesan, no ita la iha mudansa ba perfil estadu ninia,” Diretora Fokupers Pereira dehan iha knar fatin Farol.

Diretóra ne’e mós preokupa ba desizaun ne’e, tanba fó impaktu ba ferik, katuas, inan fó susu no inan isin rua sira.