Terça, Maio 21, 2024
Total visitors: 766366

Prezidente Asosiasaun Partera Timor-Leste (APTL), Dra. Lidia Gomes husu ba Ministério da Saúde (MS) atu prepara uluk kondisaun bainhira atu koloka pesoál saúde sira ba servisu iha sentru saúde sira ne’ebé presiza.

Prezidente Asosiasaun Partera Timor-Leste (APTL), Dra. Lidia Gomes husu ba Ministério da Saúde (MS) atu prepara uluk kondisaun bainhira atu koloka pesoál saúde sira ba servisu iha sentru saúde sira ne’ebé presiza.

Nia dehan atu koloka pesoál saúde sira-ne’e ba servisu iha sentru saúde sira ne’ebé presiza, tenke prepara uluk ekipamentu sira no ai-moruk, atu nune’e bainhira pesoál saúde sira ne’ebé koloka ba servisu iha sentru saúde ou postu saúde, sira ne’e bele halo servisu ho di'ak.

“Durante ita haree sira koloka tiha ema ba servisu iha sentru saúde ou postu saúde, sira haluhan tiha oinsá atu bele prepara kondisaun, no sira mós haluhan atu halo kontrola hodi buka tuir ba pesoál saúde sira ne’ebé sira koloka ba servisu iha sentru saúde no postu saúde sira.” Nia dehan hafoin remata workshop ba hametin edukasaun eskola parteira, iha Salaun Maunbara, Timor Plaza, Díli.

Nia hatutan, atu pesoál saúde sira-ne’e atu iha motivasaun di'ak hodi servisu di'ak, mak presiza halo kontrolu ba sira nomós ekipamentu no ai-moruk sira ne’ebé sira uza hodi halo tratamentu ba komunidade sira, tanba ne’e tinan 5 tenke halo rotasaun atu nune’e pesoál saúde sira-ne’e iha motivasaun di'ak hodi halo servisu nafatin.

Reprezentante UNFPA (United Nation Population Fund) iha Timor-Leste, Dra. Domingas Bernardo hatete, kada tinan universidade sira prodús pesoál saúde sira barak, entaun presiza halo kontrola ba sira bainhira sira halo atendimentu ba pasiente sira, tanba ne’e presiza asegura pesoál saúde sira ne’e, atu nune’e bele ajuda sira servisu iha sentru saúde sira.

“Ita presiza investe tan no fó treinamentu ba pesoál saúde sira-ne’e, tanba ne’e UNFPA sempre fó suporta ba sira para bele hadi'a di'ak liutan, sira-nia kapasidade servisu no fó formasaun atu nune’e bele hasa'e sira nia koñesimentu di'ak liu tan,” nia dehan

Nia salienta, bainhira Ministério da Saúde atu halo rekrutamentu ba pesoál saúde sira presiza halo uluk teste, bainhira ema teste la liu entaun labele servisu iha sentru saúde no postu saúde sira, nomós tenke halo mós kontrolu ba pesoál saúde sira-ne’e servisu ona, labele husik de'it sira, tanba ne’e UNFPA nafatin fó formasaun ba pesoál saúde sira.