- Publika iha: 27 Agosto 2011
Komunidade suku Aisirimoru, subdistritu Aileu vila, distritu Aileu halerik kona-ba estrada ne’ebe kotu tanba impaktu husi mudansa klimatika ne’ebe mosu iha tinan ida ne’e, maibe governu seidauk hadia.
“Dala barak ona ami hatama proposta kona-ba ami nia estrada maibe laiha rezultadu to’o agora,”preokupa Xefe Aldeia 01 Aileu Vila, Antonio Bonaparte, semana kotuk iha Parlamentu Nasional bainhira mai hato’o keixa.
Tanba ne’e, nia parte husu nafatin ba Governu atu iha tempu badak nia laran bele fo apoiu ruma, liu-liu oinsa mak bele hadia hikas sira nia estrada.
Entratantu membru Komisaun G parlamentar, Deputadu Inacio Moreira,promote katak nia parte sei hato’o kestan ne’e ba iha governu atu oinsa mak sir abele tau matan ba problema ne’e.
“Hau sei koalia lapara ba parte ezekutivu atu sir abele tau matan e lolos ne’e planu governu ida ne’e mak ladun diak, tanba strada aat iha fat-fatin,”nia dehan.
Inacio preokupa tebes kona-ba orsamentu ne’ebe tinan-tinan parlamentu aprova ba iha estrada nian maibe estrada kontinua aat.
“Osan ne’e lori ba ne’ebe, estradas kuaze 90% mak ninia kondisaun ne’e aat,osan nebe mak aloka iha tinan ida ga rua ba kotuk ne’e ba iha ne’ebe, e governu tenke responsabiliza,” nia husu.
Enkuantu deputadu Bnakda CNRT Pedro da Costa hateten atu atende problema sira ne’e la’os buat ida fasil maibe defisil atu atende lalais.
“Purke ita iha estadu ida, ita iha Governu ida ,ita iha diresaun ida ten ser hare ba kestaun global, e ita tenke atende ida ne’ebe prioridade liu,e ita la’os atende ho ibun mamuk maibe presiza orsamentu,” nia dehan.
Kona-ba atu kria orsamentu emerjensia ruma tenke liu husi kriteriu ne’ebe mak iha,liu-liu ba estrada ne’ebe aat iha Aileu ne’e.
“Ten ser iha rekerimentu husi Xefe Aldeia, Xefe Suku, Administrador Sub-distritu, ten ser iha konesementu no hetan verifikasaun e superviser rejional halo evaluasaun mak foin bele hare kestaun sira ne’e,”Pedro sujere.
Entretantu bainhira jornalista tenta konfirma asuntu ne’e ba iha Sekretariu Estadu Obras Publiku,Domingos Caero maibe lakonsege tanba okupadu.