- Publika iha: 26 Agosto 2011
Maske ohin loton numeru ema moras mental aumenta ba bebeik husi tinan ba tinan maibe governu seidsuk prepara fatin ruma ka ospital ema moras mental nian atu bele rekopera sira nia saude.
“Ita iha politika ida atu fo asistensia ba ema moras mental ne’e fo tratamentu aimoruk liu husi familia no fo konselin ba familia sira atu oinsa akompanhia fo aimoruk , aihan atu klintes sira ne’e bele normalize fila fali tanba ohin loron ita seidauk iha uma mahon espesifiku ida atu tau klintes sir abele halo rekoperasaun,”hateten Silvina Dulce dos Santos, Conselor Staff Programa Asistensia moras mental iha ONG Pradet, iha nia servisu fatin Bidau Toko Baru,semana kotuk.
Maske nune’e , Pradet kontinua halo monitorizasaun ba kliente sira liu-liu feto sira ne’ebe hela iha uma no iha dalan ninin.
“Ami labele obriga sira maibe ami iha dever atu koalia ho sira nia familia oinsa mak bele fo tratamentu fo aimoruk no mos fo konsellu oinsa mak familia sir abele tau matan ba nia maluk ne’ebe moras mental ne’e,”nia dehan.
Nudar umanu, kliente sira ne’e dalaruma lakohi sulan deit iha uma laran e sira mos hakarak la’o sai ba liur, entaun ida ne’e defisil ba familia atu akompanha ho diak.
Silvina afirma, atu resolve problema ema moras mental la’os deit responsabilidade husi NGO Pradet maibe mos husi parte governu nian.
Entertantu Teofilo Julio K. Tilman, Xefe Departemento Saúde Mental Ministeriu Saude (MS), rekonese katak durante ne’e governu seidauk prepara fatin ba ema moras mental sira maibe sira mos servisu hamutuk ho organizasaun balun ne’ebe tau matan ba ema sira ne’e.
“ Hanesan foin dadaun ami kria koperasaun entre organizasaun Sáo Joáo de Deus iha Laclubar iha ne’eba fatin ida nebe apropriado tebes atu atende ba maluk sira ne’ebe hetan moras mental todan,”nia informa.
Tuir nia, organizasaun Sao Joao hamriik metin iha Timor-leste atu fo asistensia saude ba ema moras mental sira,liu-liu sira ne’ebe susar atu atende husi nia familia rasik.
“Ami haruka ba iha ne’eba maibe ho kriteriu familia tenke akompana bainhira to’o tempu ne’ebe determina atu fila tenke sai tanba fatin la permanente maibe hanesan fatin temporariu, maizumenus semana 3 ka fulan 3 tenke fila,”nia katak.
