- Publika iha: 24 Agosto 2011
Komunidade iha suku Comoro lamenta ho fornese bee moos husi Servisu Agua e Saneamentu Distritu Dili nian tanba dalabarak bee sai mai foer los no bele fo impaktu ba ema nia saude liu-liu ba labarik sira.
“Durante ne’e ami uza bee PAM nian hodi atende ami nia nesesidade loro-loron nian maibe iha ami nia bairo ne’e dala ruma bee sai mai merak ka foer los, ami pasiensia kuru depois tais fali hodi uza ba tein no hemu tanba iha ne’e ami mos laiha mota bomba entaun ami uza deit, ida ne’e halo labarik sira mear, isin manas hotu,” lamenta Agata Pereira, komunidade Comoro, semana kotuk iha Comoro, Dili.
Tuir nia, ekipa servisu ba bee SAS tuir los halo kontrola didiak, nune’e labele fo impkatu ba komunidade sira nia saude, liu-liu ba labarik sira.
“Hau hanoin ida ne’e akontese tanba tekniku sira ne’ebe servisu ba bee moos la halo kontrola didiak ba bee ne’ebe distritubui ba komunidade sira iha Dili laran, liu-liu iha tempu udan bee sai merak loos, e halo ami oan sira moras hotu bainihra konsumu bee ne’e,” nia lamenta.
Iha fatin hanesan Antonio Marques, komunidade Comoro, preokupa tebes kona-ba bee SAS ne’ebe sai la tuir oras. “Loron ida mai loron ida la mai, kuandu bee mai ona entaun bee sai foer, entaun ami taes fali depois mak uza ba tein, nono, se la’e ami nia oan bele hetan moras e hela iha Dili bee susar los,” nia dehan.
Tuir nia, tekniku sira presiza halo kontrola ba bee matan, hodi hare bee foer ka la’e antes atu distribui ba komunidade sira, tanba maioria komunidade iha Dili laran uza bee SAS nian.
