- Publika iha: 26 Agosto 2011
Atu prosesu eleisaun jeral ne’ebe sei halao iha 2012 bele la’o ho diak no seguru, Polisia Nasional timor-leste (PNTL) no Polisia Nasoens Unidas (UNPOL) sei halo treinamentu hamutuk hodi prepara ba eleisaun tinan oin.
“ Membru PNTL na’in 29 hamutuk ho membru UNPOL na’in 22 sei partisipa iha treinamentu konjunta ida ne’e hodi prepara an ba eleisaun 2012 nian,” informa Komandante Jeral PNTL, Komisariu Longinhos Monteiro, semana kotuk iha Kaikoli, Dili.
Tuir nia, nia parte sei garantia estabilidade ba eleisaun prezidensial no lejislasaun ne’ebe halao iha 2012 sei la’o ho diak.
Treinamentu hamutuk ne’e sei lidera direitamente husi Komisariu Longuinhos Monteiro no mos Komandante UNPOL, KOmisariu Luis Carilho.
Entretantu tuir Komandante UPOL, Luis Carilho katak iha treinamentu ne’e, membru polisia sira sei aprende oinsa atu jere operasaun durante eleisaun la’o hela, dezastre natural sira no dezorden sivil.
“Susesu eleisaun sira - ne’e importante ba ita hotu hodi fo seguransa durante periodo eleisaun sira , ita fo apoio ba prosesu demokratiku, “ Carrilho dehan.
Tuir nia, ONU sei mantein nia membru sira hamutuk 1.280 hodi fo apoiu ba PNTL to’o eleisaun hotu, hafoin ne’e UNMIT bele planeia hela kona-ba atu sai husi TL.
Enkuantu Komandante Operasional, Superintendente Eugenio Perreira hateten iha programa ne’e sei involve mos komandante polisia husi distritu sira,nune’e sira mos bele iha konesementu no bele organiza sira nia membru ba preparasaun festa demokrasia ne’e.
“ Iha ne’e ami mos konvida komandante operasional husi distritu sira atu sira bele organiza ni membru sira ho diak liu tan iha eleisaun tinan oin nee,”nia hateten.
