- Publika iha: 24 Agosto 2011
Staf Unidade Mikro Nutrisaun Ministeriu Saude (MS), Epifania Marques hateten susu been formula bele prejudika bébé nia saude liu-liu hetan moras komplikasaun bainhira nia bo’ot mai.
“Labarik sira hemu susu been formula ne’e dalaruma hetan moras ispa no moras seluk tanba inan sira fo hahan seluk ba bebe antes halo fulan 6. Bebe nia stomag ne’e seidauk prontu atu simu hahan ne’ebe mak to’os no halo sistem pencernaan dala ruma fraku no halo labarik laiha vontade han e bele mosu malnutrisaun,” hateten Epifania…semana kotuk iha SPK Lahane,Dili.
Tuir nia, susu been ne’ebe diak ba bébé mak susu been inan nian, liu-liu antes tama fulan 6 labele fo hahan seluk .
“Susu been inan riku ho vitamina oi-oin, depois moos nia bele prevene moras hanesan infeksaun sira tanba ne’e mak ita fo deit susu been inan nian,”nia dehan.
Epifania afirma, susu been inan nian bele prevene moras oi-oin husi bebe, tanba ne’e antes tama fulan 6 labele fo hahan ka susu been formula ba bebe.
“Bele fo maibe depois de bebe liu fulan 6, maibe ne’e hanesan ajuda deit susu been inan nian, la’os sira tenke hemu mak foin bele moris diak, la’e,”nia katak.
Tuir nia, durante ne’e iha inan balun seidauk hatene informasaun kona-ba importansia susu been inan kompara ho susu been formula. “Sira dehan susu been formula halo labarik boot lalais no matenek, ne’e loos maibe la’os bebe moris mai fo kedas entaun ita mak hakarak ita nia hetan moras,”nia hateten.
“Kompara susu been inan no susu formula,susu been inan ita lapresiza hasai osan barak, maibe susu formula ita hasai osan barak, sa’tan agora folin sasan iha merkadu sa’e maka’as, tanba ne’e diak liu susu been inan duke susu formula,”nia kompara.
Entretantu tuir Angelina Fernandes, staf husi Programa Saude Inan no Oan Fundasaun Alola, katak susu been inan importante no diak liu duke susu formula.
“ Alende proteje oan husi moras oi-oin, depois susu been inan ne’e fasil liu atu fo ba bebe wainhira bebe moris mai, e hanesan prezenti ida ba bebe, maibe kuandu ita fo susu formula iha nia impkatu barak ba bebe bele hetan moras oi-oin e mos karik inan-aman kbi’it la to’o sira sosa susu formula ho saida, karik sosa tiha depois lahatene nia takaran (sukat) fo nar-naran diet halo bebe sai moras fali,”nia dehan.
Iha parte seluk komunidade Lahane e mos hanesan inan ida, Maria Lurdes, hateten kona-ba susu been ne’ebe fo ba bebe depende ema ida-idak nia hanoin.
“Inan balun wainhira nia bebe moris mai halo fulan 3, sira fo ona susu been formula ba nia bebe liu-liu ba inan sira ne’ebe servisu, enkuantu ba inan sira iha area rural, bainhira sira nia susu been maran, osan laiha atu sosa susu formula, entaun sira fo deit ona bee moos ba nia oan e ikus mai labarik hetan malnutrisaun,”nia hateten.
