- Publika iha: 24 Agosto 2011
Atu feto potensial sira iha distritu bele prepara aan ho didiak, feto iha nivel nasional presiza fahe esperiensia ba malu hodi prepara estratejia nune’e bele iha planu ne’ebe seguru iha elisaun feto parlamentar 2012.
“Ita hatene katak elisaun jeral besik dadaun ona e ita iha ona lei eleitoral liu-liu kona-ba feto nia kandidata aan ba iha eleisaun ne’e e alende feto iha nivel nasional mos feto iha distritu mos bele prepara aan didiak,” koalia Sekretaria Estadu Promosaun e Igualidade (SEPI) Idelta Maria Rodrigues, semana kotuk iha enkontru nasional ho reprezentante feto husi distritu 13 no autoridade lokal sira kona-ba partisipasaun feto nian iha eleisaun parlamentar 2012, iha Salaun Cannosa Becora, Dili.
Tanba ne’e, nia espera katak ho enkontru ida ne’e sei lori hamutuk feto sira nian hodi fo apoiu ba malu, atu feto sira iha partisipasaun maximu iha vida publiku no politika no hamosu solusaun inovativu hodi kombate dezafiu sira ne’ebe sai impedementu ba feto sira.
Entretantu Javier Jose Carvino, reprezentante Ajensia Spanyol Paz Y Desarrollo, hateten objetivu jeral husi enkontru ida ne’e atu feto otensial sira bele hatene katak sira iha direitu atu partisipa iha vida politika.
“Meius importante ida ne’ebe tau hamutuk feto sira nudar feto potensial ne’ebe importante iha komunidade reprezentante husi 13 Distritu iha fatin ida ne’e atu fahe esperensia atu nune’e bele promove direitu feto nian hodi enkoraja feto maluk sira nia konsiensia rasik hodi hala’o sira nia knar atu responde ba feto nia luta no hadia feto nia moris iha setores hotu- hotu,” nia dehan.
Tuir Javier, Ajensia Paz Y Desarollo hanesan ajensia ida ne’ebe servisu ba promove igualidade e alende iha Espanyola, sira mos ajuda ona feto iha nasaun hanesan Banglades, Cambodia, Filipina, Vietnam no Timor-leste.
“Iha Timor-leste maka atu promove partisipasaun feto iha politica no sivil iha nivel suku fo apoiu ba membru konsellu de suku feto no mane atu hala’o sira nia atividade lor- loron hodi identifika no akompana feto potensial ba elisaun tuir mai,” nia dehan.
