Ministériu Edukasaun (ME) implementa programa ensinu ekivalénsia iha eskola Ensinu Sekundariu Tékniku Vokasionál-Komérsiu (ESTV-Komérsiu), iha Bekora, kapital Dili, hodi fó oportunidade ba joven sira ne’ebé para eskola hodi bele kontinua fali estudu to remata.
Sekretáriu ba Sekretariadu Estadu Ensinu Sekundariu Jerál no Tékniku Vokasionál iha ME Domingos Lopes Lemos hatete, programa refere liga ba prioridade ministério nian kona-ba fó espasu ba sidadaun hotu asesu ba edukasaun no laiha limite ba idade no estadu sosiál.
“Ho ME lansa programa projetu pilotu edukasaun ensinu ekivalénsia iha eskola ESTV-Komérsiu Bekora Postu-Administrativu Cristo-Rei Munisípiu Díli hodi oportunidade ba joven sira ne’ebé para eskola iha sekundáriu bele kontinua fila fali,” nia dehan.
Nia dehan, tuir observasaun ne’ebé iha katak joven barak mak durante ne’e para eskola iha ensinu sekundáriu, tanba iha situasaun balun ne’ebé sira hasoru no atu kontinua fali moe tanba idade boot ona.
Nia dehan, programa ne’e sai hanesan objetivu prioritáriu ida husi setór edukasaun.
“Antes ne’e ita iha ona sentru komunitária hamutuk atus-ida-sanolu-resin-walu (118) iha territóriu laran hodi fó formasaun ba joven sira ne’ebé para eskola nune’e husi programa ekivalénsia ne’e, sira bele hetan sertifikadu hodi kontinua fali estudu sekundáriu,” nia hatete.
Nia dehan, sentru komunitária ekivalénsia ne’e paradu ona iha tinan hirak liuba, tanba ne’e ministério lansa fali programa edukasaun ensinu ekuivalensia iha ESTV-Komérsiu Bekora, iha Dili, atu nune’e fasilita joven sira ne’ebé para eskola nune’e bele kuntinua fali.
“Husi programa ekivalénsia ne’e joven sira ne’ebé partisipa sei hetan sertifikadu nune’e bele kontinua fali eskola iha universidade,” Sekretariu Estadu Lemos dehan.
Nia informa, joven adultu Timoroan barak maka interrompe sira-nia estudu, tanba razaun ekonómiku, família, profisionál, ka sosiál, maibé, sira sei lakon sira-nia direitu atu aprende, hodi kompleta ensinu sekundáriu, hodi hari futuru ida-ne’ebé di’ak liu ba sira-nia an, sira-nia família, no nasaun.
Iha parte seluk Sekretario Nasional Rede Edukasaun Timor-Leste Coalition for Education (TLCE) Jose Monteiro hatete, ME lansa eskola ekivalénsia ne’e hodi kontinua programa alfabetizasaun nian.
“Dadaun ne’e komesa halo ona rejistrasaun ba estudante sira ne’ebé hakarak atu kontinua ba ensino ekivalénsia iha sekundáriu,” nia dehan.
Nia dehan, ME esforsu hodi fó espasu ba ema hotu asesu ba edukasaun, maibé dezafiu ne’ebé sira nafatin hasoru mak orsamentu.”Ita espera katak iha lansamentu programa ne’e bele lao di’ak no sei la hasoru tan difikuldade, programa ne’e labele iha de’it Díli, tenke lori to’o munisípiu,” nia dehan.
