Konfederasaun Sindikatu Timor-Leste (KSTL) husu ba empregadór no família sira atu labele halo esplorasaun ba trabalhador doméstika sira-nia direitu, tanba sira mós servisu atu sustenta moris família nian.
Porta-voz KSTL, Vieira Tera-Santa, hateten katak trabalhador doméstika barak durante ne’e hasoru situasaun ne’ebé la justu, liuliu relasiona ho saláriu ne’ebé la tuir padrãun mínimu no tratamentu ne’ebé la dignu iha fatin servisu.
“Ita husu empregadór no família sira ne’ebé fó servisu ba trabalhador doméstika sira atu labele halo esplorasaun ba sira-nia direitu. Sira mós trabalhador hanesan ema seluk no tenke hetan tratamentu ne’ebé di’ak,” nia hatete.
Nia dehan, trabalhador doméstika sira durante ne’e hasoru dezafiu boot iha mundu traballu, tanba balun simu saláriu ki’ik tebes no la hetan benefísiu trabalhista ne’ebé apropriadu.
“Tuir loloos, empregadór sira tenke respeita direitu trabalhador nian. Bainhira trabalhador hala’o nia dever, empregadór mós tenke asegura nia direitu hanesan saláriu ne’ebé tuir padrãun, tempu descanso no feriadu tuir lei,” nia informa.
Nia hatutan katak trabalhador doméstika balun simu saláriu menus husi USD 80 fulan ida, no balun mós la hetan direitu ba feriadu. Tuir nia, situasaun ida-ne’e presiza atensaun husi entidade relevante sira.
“Ita tenke dignifika trabalhador sira hotu tanba sira mós kontribui ba dezenvolvimentu nasaun nian. Promove traballu dignu mak dalan ida atu hametin justisa sosial no moris-di’ak ba ema hotu,” dehan Vieira Tera-Santa.
Nia hatete tan katak iha prosesu dezenvolvimentu nasaun nian, importante tebes atu garante katak servisu hotu-hotu iha valor no rekoñesimentu, inklui servisu doméstiku ne’ebé durante ne’e dala barak la hetan atensaun sufisiente.
Iha parte seluk, trabalhadora doméstika Joanina Sarmento hateten katak durante ne’e nia servisu hanesan ajudante doméstika iha uma ida iha Díli no simu saláriu USD 120 kada fulan.
“Maske servisu ne’e la fasil, ha’u kontinua halo tanba presiza ajuda sustenta família. Maibé dala ruma ami mós hasoru tratamentu ne’ebé la di’ak no oras servisu ne’ebé naruk liu,” nia hatete.
Nia dehan, dala ruma nia hasoru tratamentu ne’ebé la apropriadu husi empregadór sira, liuliu relasiona ho oras servisu no tempu descanso.“Situasaun hanesan ne’e viola ami-nia direitu. Maibé dala barak ami lakohi koalia tanba tauk lakon servisu ne’ebé ajuda sustenta família,” nia informa.
