Polísia Nasionál Timor-Leste (PNTL) liuhusi Komandu Munisípiu Díli dadaun ne’e fortifika seguransa hodi kontrola grupu deskoñesidu sira ne’ebé sempre halo asaltu ba ema iha dalan públiku iha tempu kalan.
Komandante Polísia Munisípiu Díli, Superintendente Xefe Orlando Gomes dehan, asaltu ema iha dalan ne’e krime no impede ema seluk nia liberdade sirkulasaun, tanba ne’e polísia sei la tolera aktu hirak ne’e.
“Liga ba akontesimentu ida foin lalais akontese iha área Hera nian ne’ebé grupu deskoñesidu lori arma branka asaltu ema iha dalan, tanba ne’e ita fortifika ona seguransa iha tempu kalan hodi kontrolu no identifika grupu deskoñesidu sira ne’ebé gosta halo asaltu hodi hakanek ema iha dalan públiku,” nia informa.
Nia dehan, dadaun ne’e polísia kontinua buka tuir hela grupu deskoñesidu sira ne’ebé realiza aktu kriminál ida-ne’e hodi submete ba prosesu.
“Bainhira identifika grupu hirak ne’e ita laiha toleransia ba sira no ita sei prosesu, tanba ida-ne’e krime,” Komandate Polísia Munisípiu Díli Superintendente Xefe Gomes informa via Whashapp.
Nia hatete, dadaun ne’e ekipa servisu informasaun mós halo hela nia servisu hodi identifika ema sira ne’ebé gosta impede ema seluk nia sirkulasaun iha dalan públiku.
Entretantu, komunidade Terezinha da Costa hateten, aktu asaltu ne’ebé akontese iha dalan públiku ne’e risku tebes ba ema-nia vida bainhira movimentu iha tempu kalan.
“Ami husu ba polísia atu fó seguransa másimu iha estrada iha tempu kalan liu-liu area ne’ebé mak dook husi komunidade sira hela ba atu nune’e bele garante sirkulasaun ema nian ho seguru,” nia dehan.
Nia dehan, dalan públiku ne’e tenke livre no seguru ba ema hotu atu movimentu, tanba ne’e parte seguransa tenke tau atensaun ba ida-ne’e.”Nune’e mós husu ba Autoridade iha Suku Hera atu kontrolu nia joven sira nune’e tenke koñese mós nia komunidade sira no apoiu polísia hodi buka ema hirak ne’e,” Komunidade Costa salienta.
