Autoridade Suku Bemori, Postu-Administrativu Nain Feto, Munisípiu Díli, utiliza teknolojia dijitál liuhusi programa Suku Dijitál ne’ebé implementa husi Sekretaria Estadu Komunikasaun Sosiál (SEKOMS), hodi fasilita komunidade asesu informasaun no servisu públiku.
Xefe Suku Bemori, Francisco Siqueira, hateten katak inisiativa refere sai pasu importante ida atu aproxima komunidade ho teknolojia moderna no fasilita asesu informasaun no servisu públiku iha nivel lokál.
“Durante ne’e ami hetan ona treinamentu no formasaun, no ohin ami konsegue lansa Suku Dijitál iha Suku Bemori. Ida-ne’e hanesan oportunidade boot ida ba ami atu bele hetan informasaun no fó-sai atividade sira iha ami-nia suku liuhusi internet,” dehan Francisco Siqueira hafoin lansamentu ofisiál iha Sede Suku Bemori, Díli.
Nia mós hateten katak komunidade simu programa refere ho entusiasmu, tanba agora sira bele asesu informasaun ho lalais liuhusi meiu dijitál, no katak programa ne’e ajuda autoridade suku atu sai transparente liután no fasilita komunikasaun entre lideransa no komunidade.
“Komunidade simu di’ak tebes programa ida-ne’e tanba ami mós agora tama iha Suku Dijitál, ami bele fó-sai informasaun kona-ba atividade no dezenvolvimentu iha suku nian,” nia hatutan.
Iha parte seluk, Sekretáriu Estadu Komunikasaun Sosiál, Expedito Dias Ximenes, esplika katak implementasaun Suku Dijitál iha Bemori tuir pedidu komunidade no mós hanesan parte husi estratéjia governu atu alarga asesu informasaun ba sidadaun sira iha territóriu tomak.
“To’o agora governu konsege lansa ona Suku Dijitál iha maizumenus suku 25 iha kapitál Díli, no planu governu nian mak durante mandatu ida-ne’e pelu menus suku hotu-hotu bele tama iha sistema dijitál,” dehan Expedito.
Nia hateten katak programa Suku Dijitál integra sentru informasaun ne’ebé permite autoridade lokál sira atu uza plataforma dijitál hodi fahe informasaun kona-ba suku, inklui dadus populasaun, progresu dezenvolvimentu no utilizasaun orsamentu.
Tuir nia, ho avansu teknolojia nian, autoridade suku sira agora la presiza ona halo komunikasaun ho maneira tradisionál de’it, hanesan la’o ba fatin-fatin atu fó avizu, maibé bele utiliza plataforma dijitál atu hato’o informasaun ho lalais no efisiente.
“Plataforma ida-ne’e la’ós de’it ba informasaun, maibé mós ba atendimentu públiku. Komunidade bele halo dokumentu sira iha forma dijitál no hetan informasaun liuhusi númeru kontaktu ne’ebé disponivel,” nia hateten.
Nia afirma katak aleinde asesu informasaun, plataforma Suku Dijitál mós fó oportunidade ba komunidade atu asesu servisu públiku hanesan deklarasaun, guia óbitu, dokumentu administrativu no prosesu seluk ne’ebé antes presiza tempu no deslokamentu.
