Movimentu Estudante Universitáriu Timor-Leste (EUTL) la konkorda ho implementasaun dekretu-lei foun númeru 17/29/2026 kona-ba aumentu taxa administrativa ba transporte, tanba konsidera medida refere la kondís ho realidade moris povu nian.
Portavóz EUTL, Natalino Nunes Martins, dehan katak dekretu-lei foun ne’ebé Diresaun Nasionál Transporte Terrestre (DNTT) implementa hamosu konfuzaun ba públiku, tanba la tuir realidade ekonómika povu nian.
“EUTL la konkorda ho aplikasaun taxa administrativa foun ba transporte ne’e tanba la kondís ho povu-nia moris. Tanba ne’e, ita husu atu mantein implementasaun lei anterior númeru 03/2010 nian.
Tanba antes ne’e inspesaun ba motorista selu taxa USD 14, maibé ho lei foun ne’e sa’e fali ba USD 42, no kareta ki’ik hanesan Carry ne’e USD 28 sa’e ba USD 84. Ida-ne’e la han malu ho realidade moris povu nian,” nia dehan.
Nia dehan katak maski dekretu-lei foun refere implementa ona, EUTL sei hamutuk ho povu hodi ezije governu liuhusi Ministériu Transporte no Komunikasaun (MTK) atu halo alterasaun ba dekretu-lei refere.
“Ita husu halo mudansa ba lei foun ne’ebé vigora hela, maibé la’ós ba artigu hotu, maibé ba liña sira ne’ebé la kondís ho sidadaun baibain nia ekonomia moris,” Portavóz EUTL Nunes dehan iha MTK, Kaikoli, Díli.
Nia dehan katak EUTL iha ezijénsia primária rua (2), mak atu mantein dekretu-lei númeru 03/2010 ka mantein dekretu-lei foun ho alterasaun ba dispozisaun sira ne’ebé la responde ba nesesidade povu nian.
Entretantu, Ministru MTK, Miguel Marques Gonçalves Manetelu, dehan katak MTK hala’o ona sorumutu ho EUTL hodi diskute preokupasaun públiku kona-ba aumentu taxa inspesaun administrativa ba transporte, ne’ebé konsidera la kondís ho realidade moris povu nian.
“Ita kompromete ona katak sei halo alterasaun ba dekretu-lei númeru 17/29/2026 hodi hatún taxa administrativa ba transporte tuir nesesidade povu nian,” Ministru MTK Manetelu salienta iha nia servisu fatin, Kaikoli, Díli.
Nia dehan katak iha ona konkordánsia entre EUTL ho MTK no husu estudante sira atu fó tempu ba governu hodi halo alterasaun, nune’e implementasaun medida refere labele hamosu tan problema seluk no reasaun husi públiku.
“Pedidu husi estudante sira katak atu hatuur fila fali diploma ministeriál ida uluk, maibé ha’u dehan katak ita sei la fila ba ida-ne’e tanba revoga tiha ona, liuliu regulamentu sira ne’ebé atu regulariza kona-ba osan. Tanba ne’e, la ho diploma maibé tenke halo ajustamentu iha dekretu-lei ne’e hodi halo alterasaun,” nia informa.
Nia informa katak implementasaun dekretu-lei foun refere la’ós ho intensaun atu fó presaun ba públiku iha situasaun krize, maibé dekretu-lei ne’e prepara kleur ona liuhusi prosesu lubuk ida.Tuir informasaun iha dekretu-lei refere, taxa inspesaun ba motorista ne’ebé antes USD 14 ho durasaun fulan neen (6), aumenta ba USD 42 ho durasaun tinan ida (1). Ba kareta Carry, taxa antes USD 28 aumenta ba USD 84, no mini-kamioneta husi USD 42 aumenta ba USD 126, ho durasaun taxa ba tinan ida (1).
