Komandante-Jerál (KomJer) Polísia Nasionál Timor-Leste (PNTL) orienta ona Diresaun Servisu Investigasaun Kriminál (DSIK) atu fortifika operasaun hodi buka tuir autór prinsipál ba jogu online ilegál.
Diretór DSIK, Superintendente Xefe João Belo dos Reis, dehan katak relasiona ho kazu jogu online ne’ebé akontese iha Timor-Leste, to’o agora seidauk identifika autór prinsipál no dadaun ne’e DSIK simu ona orientasaun husi komandu hodi kontinua buka tuir.
“Komandante-Jerál orienta ona DSIK atu fortifika operasaun hodi buka tuir autór prinsipál kona-ba kazu jogu online ilegál hodi submete ba prosesu,” nia dehan.
Nia hatete katak dadaun ne’e DSIK no Servisu Intelijénsia sira fortifika operasaun konjunta tuir orientasaun husi komandu atu buka tuir no kaer autór prinsipál sira hodi kontinua prosesu ba tribunál, nune’e sira bele responsabiliza ba aktu krime ne’ebé sira halo.
“Atu kombate atividade jogu ilegál sira, tenke prosesu autór prinsipál sira, tanba bainhira autór prinsipál seidauk kaptura, kazu jogu ilegál sei kontinua akontese,” Diretór DSIK Superintendente Xefe Reis informa iha Kaikoli.
Nia dehan katak bazeia ba orientasaun servisu ne’ebé sira simu, klaru katak sei la fó fatin ba krime organizadu nia ezisténsia iha Timor-Leste.
“Operasaun ne’e la’ós iha Díli de’it, maibé to’o munisípiu sira hotu,” nia informa.
Aleinde ne’e, nia husu ema hotu atu koopera hamutuk ho parte seguransa hodi kombate krime jogu online ilegál, liuliu iha identifikasaun ba autór prinsipál.
Iha parte seluk, Diretór Ezekutivu ONG Belun, Luiz Ximenes, hatete katak autór prinsipál ba kazu jogu online ne’e bele dehan la’ós ema baibain, maibé ema sira ne’ebé iha forsa iha termus finanseiru no rekursu umanu.
“Ema sira ne’ebé hatene lei hodi manipula atividade hirak ne’e, maibé ita fiar katak husi esforsu ne’ebé parte polísia sira halo sei bele kaer autór prinsipál hirak ne’e hodi prosesu tuir lei ne’ebé vigora iha Timor-Leste,” nia dehan.
Nia hatete katak nasaun ne’e rai lulik ba ema hirak ne’ebé realiza jogu online hodi halo esplorasaun ba ema seluk, no fiar katak loron ida sira sei simu konsekuénsia husi aktu ne’ebé halo ema seluk sai vítima.Aleinde ne’e, nia dehan katak ida-ne’e problema nasaun nian no tenke responde ho koletivu. Labele haree hanesan servisu DSIK nian, PCIC nian ka Tribunál nian de’it, maibé tenke responde ho koletivu atu nune’e Timor-Leste labele sai baze ba ezisténsia krime organizadu.
