Xefe Suku Bidau Santa Ana, Postu-Administrativu Cristo Rei, Munisípiu Díli, Alexandrino M. da Costa, husu governu atu kria uluk kondisaun no prepara fatin apropriadu ba negosiante ambulante no peskadór sira antes implementa medida atu hasai sira husi área tasi-ibun, tanba maioria negosiante sira depende ba atividade refere hodi sustenta família.
Xefe Suku Alexandrino esplika katak durante ne’e nia sempre buka solusaun entre autoridade no negosiante sira, tanba tuir nia, sira la halo atividade ilegál, maibé buka de’it osan atu moris.
“Sira-ne’e la’ós halo krime. Sira mai buka nesesidade loroloron hodi sustenta uma-laran. Se governu hakarak hapara, tenke kria uluk kondisaun ne’ebé bele fasilita sira,” dehan nia.
Nia akresenta katak se governu prepara fatin ne’ebé apropriadu, komunidade no negosiante sira sei prontu kopera no tuir orientasaun autoridade relevante sira.
Iha parte seluk, negosiante ambulante Alda Sarmento hateten katak rendimentu família depende loos ba kompradór sira, tanba osan ne’ebé hetan mak uza atu sustenta moris no selu eskola oan sira.
“Kuandu vizitante barak, ami bele hetan to’o dolar 20 ka 30. Maibé loron balun ami hetan de’it dolar 10 ka 15. Bainhira muda ami senti triste, tanba ami depende de’it ba servisu ida-ne’e,” dehan Alda.
Peskadór Mariano Ribeiro dehan katak profisaun peska iha fatin refere hala’o ona husi tempu Indonézia no nia husu governu atu determina uluk fatin alternativu antes muda sira.
“Se sira hakarak muda ami, tenke hatudu uluk fatin foun. Ami-nia bero no ekipamentu boot, la bele muda de’it laiha preparasaun,” dehan Peskadór Mariano.
Hatán ba preokupasaun sira-ne’e, Administradór Postu-Administrativu Cristo Rei, Fernando de Araújo, esplika katak medida ne’ebé Munisípiu Díli implementa la’ós atu hasusar moris negosiante sira, maibé atu garante kumprimentu lei, ijiene no orden públika.
“Ami komprende vendedór no peskadór sira buka moris. Maibé iha regra no lei ne’ebé tenke kumpri atu atividade komersiál hala’o iha fatin apropriadu no la fó impaktu ba saúde públika no limpeza,” dehan Administradór Postu-Administrativu Fernando.
Nia hatutan katak autoridade sira fó ona avizu ba negosiante sira no medida refere mós liga ho preparasaun ba projetu konstrusaun estrada iha área besik Sede Suku Bidau Santa Ana ni’an.“Área ne’ebá presiza prepara, tanba iha projetu konstrusaun estrada. Enkuantu ne’e, ami buka hela solusaun no fatin apropriadu ba atividade komersiál sira,” nia akresenta.
