Negosiante ikan iha área Pantai Kelapa, Suku Bebonuk, Postu-Administrativu Dom Aleixo, Munisípiu Díli, kontinua fa’an ikan iha tasi-ibun, tanba konsidera fatin ne’ebé governu prepara iha merkadu sira iha kapital la favorável atu hala’o atividade komérsiu.
Negosiante ikan Agapito Soares hateten katak governu halo ona desizaun atu hasai negosiante sira husi tasi-ibun no muda ba Merkadu Manleuana, maibé kondisaun iha merkadu refere la favorável atu hala’o atividade komérsiu.
“Ami bá ona iha ne’ebá, maibé fatin la di’ak no ema atu bá hola ikan mós menus, entaun ami husu ba Xefe Suku Bebonuk atu permite ami kontinua fa’an iha tasi-ibun ne’e,” dehan Agapito iha tasi-ibun Suku Bebonuk, Díli.
Nia relata katak autoridade sira hanesan Sekretariadu Estadu Asuntu Toponímia no Organizasaun Urbana (SEATOU) tenta ona atu hasai sira husi fatin refere, maibé intervensaun husi lideransa lokál halo situasaun ne’e rezolve.
“Sira mai atu hasai ami, maibé Xefe Suku esplika ba sira, entaun sira fila de’it,” nia hateten.
Nia dehan katak problema boot liu mak falta infraestrutura atu garante kualidade ikan, tanba ikan presiza rai iha fatin apropriadu.
“Ikan ne’ebé ami kaer ohin, tenke fa’an hotu iha loron ne’e. Se lae, aban sei dodok ona tanba la iha fatin atu rai di’ak,” nia dehan.
Nia akresenta katak se governu hakarak muda negosiante sira, tenke prepara uluk fatin ne’ebé kompletu ho fasilidade hanesan armazenamentu, sistema refrejerasaun no asesu ba merkadu.
Iha parte seluk, Xefe Suku Bebonuk, Alfredo da Costa, konfirma katak nia fó ona autorizasaun temporária ba negosiante ikan sira atu kontinua fa’an iha tasi-ibun hodi evita sira lakon rendimentu.
“Ha’u mak fó autorizasaun ba sira atu fa’an lai iha ne’e, hodi hein governu hadi’a ona fatin apropriadu,” hateten Alfredo.
Alfredo dehan katak ikan la hanesan sasán seluk ne’ebé bele rai kleur, tanba se ohin la fa’an hotu, aban balun sai aat ona, no katak falta fatin apropriadu halo negosiante sira hasoru difikuldade atu buka moris.
Nia asegura katak bainhira governu prepara ona infraestrutura ne’ebé adekuadu, nia sei ko’alia fali ho negosiante sira atu muda ba fatin ne’ebé legál no organizadu.
Iha nivel nasionál, Primeiru-Ministru Xanana Gusmão mós rekoñese katak problema refere seidauk iha solusaun klaru, tanba negosiante ikan barak kontinua fa’an iha dalan no fatin públiku sira, ne’ebé bele hamosu problema ba ordenamentu urbanu no saúde públika.
“Ita fó ona lisensa ba kompañia atu bá kaer ikan, maibé depois kaer, laiha fatin atu tau no proteje ikan sira-ne’e,” dehan Primeiru-Ministru.
Nia mós alerta katak iha prátika balun ne’ebé la saudável, hanesan fa’an ikan ne’ebé la hotu iha loron ida, depois kontinua fa’an fali iha loron tuirmai ho uza bee atu fase ikan ne’ebé la fresku.Primeiru-Ministru husu Ministériu Agrikultura, Pekuária no Peskas atu tau prioridade ba rezolve problema refere liuhusi infraestrutura adekuadu, hanesan merkadu modernu, sistema refrejerasaun no lojístika distribuisaun.
