Organizasaun Non Governamental (ONG) Rede Edukasaun Timor-Leste Coalition for Education (TLCE) konsidera desizaun ne’ebé Ministériu Edukasaun (ME) hodi taka eskola, ne’e la viola direitu estudante nian hodi asesu ba edukasaun.
Koordenadór TLCE Jose Monteiro dehan, eskola paralelu hirak ne’ebé mak ME taka ne’e estudante minimu liu, lamerese atu estabelese eskola paralelu no sira tenke ba eskola iha sentral. Tanba ne’e TLCE apoiu desiizaun ME taka eskola hirak ne’e.
“TLCE konsidera desizaun taka eskola hirak ne’e la viola direitu estudante nian asesu ba edukasaun, maibé komunidade eskolár mak la priense kritéria,” nia hatete iha knaar fatin, Díli.
Nia hatete, eskola paralelu ida iha ema na’in 10 ka 20 no materia hamutuk 12 entaun tenke koloka profesór hamutuk 12 ba iha eskola refere hodi hanorin estudante hirak ne’e de’it, tanba ne’e mak kontinua hamosu problema menus profesór.
Tanba ne’e nia hatete, ME deside taka eskola hirak ne’e, tuir informasaun estudante hirak ne’e integra fali ba iha eskola senrál hodi kontinua prosesu aprendizajen la’ós abandona sira.
“Viola estudante sira-nia asesu ba edukasaun bainhira ME taka tiha eskola no abandona estudante sira hodi la partisipa iha prosesu aprendizajen, maibé lori ona ba iha eskola sentrál,” Koordenadór TLCE Monteiro informa.
Nia hatete, ME hasai nia desizaun nune’e mós kumpri nia responsabilidade hodi trata nia estudante sira ho di’ak hodi asesu ba edukasaun.
Alende ne’e nia dehan, tuir peskiza ne’e sira halo eskola paralelu ne’ebé ME taka ne’e la’ós de’it menus estudante, maibé laiha fasilidade eskola nian.
Iha parte seluk Diretór Nasionál Ensino Sekundáriu iha ME Deolindo da Cruz hatete, estudante husi eskola sira ne’ebé taka, antes ne’e sira-nia naran enkamina ona ba iha eskola sentrál no anu letivu tinan ida-ne’e sira hahú aula iha sentrál ona.
“Ita la viola estudante nia direitu ba edukasaun,” nia informa.
Nia husu ba inan-aman sira atu kumpri sirkular ne’ebé mak ME hatun ona, hodi taka eskola paralelu sira no obrigatoriu estudante tenke ba eskola iha sentrál.
Iha parte seluk Komunidade Agueda Martins dehan, governu haruka estudante sira atu ba eskola iha sentrál, maibé oinsa ho hela fatin, tanba estudante balun laiha familía ka uma besik iha areadór eskola nian.
“Ami familía balun mós laiha kbiit atu aluga uma ba oan sira hela hodi asesu ba eskola ne’ebé besik,” nia dehan.Nia husu ba Ministériu Edukasaun (ME) karik bele fasilita hela fatin ba estudante sira ne’ebé husi eskola paralelu ba iha eskola sentrál.
