Ministériu Edukasaun (ME) konsidera teste programa Early Grade Reading Assessment (EGRA) no Early Grade Mathematics (EGMA) sai hanesan sasukat hodi avalia kapasidade estudante sira, liuliu iha ensinu báziku primeiru síklu molok tama ba segundu síklu.
Ministra Edukasaun, Dulce de Jesus Soares, hateten katak programa EGRA no EGMA implementa iha eskola ensinu báziku primeiru síklu hodi fasilita estudante sira aprende lee no komprende matemátika bázika. Nia informa katak antes ezame terseiru trimestre, ME sei hala’o uluk teste nasionál ba programa EGRA no EGMA.
“Teste nasionál ba programa EGRA no EGMA ne’e sai hanesan sasukat ida hodi sukat kapasidade estudante ensinu báziku primeiru síklu nian molok hakat ba segundu síklu,” nia informa.
Nia hatete katak objetivu husi teste refere atu avalia estudante sira-nia kapasidade bázika iha lee, hakerek no sura hodi prepara ba segundu síklu, nune’e mós avalia kapasidade profesór sira-nian.
“Nune’e ita bele asegura kualidade aprendizajen iha tinan dahuluk iha eskola bázika primeiru síklu nian,” Ministra Soares salienta.
Nia hatete katak presiza tau atensaun maka’as liu ba síklu primeiru, tanba ne’e mak fundamentál ba síklu tuirmai. Nia haktuir katak se estudante la aprende di’ak atu lee ho kompreensaun no la domina operasaun bázika matemátika iha tinan ida (1) to’o tolu (3), sira sei hasoru difikuldade boot iha grau aas liu.
Nia informa katak teste EGRA foka ba avaliasaun abilidade leitura nian, hanesan koñese letra, lee sílaba no liafuan, fluénsia lee no kompreensaun ba istória ki’ik no katak EGMA foka ba abilidade numerasia bázika, hanesan konta, koñese númeru, operasaun adisaun no subtrasaun simples no rezolve problema loroloron nian.
Entretantu, Diretór Servisu Edukasaun Munisípiu Manatuto, Patricio Quintão, dehan katak aleinde identifika abilidade estudante sira-nian, rezultadu teste refere mós bele uza hodi dezenvolve formasaun intensiva ba profesór síklu primeiru sira.
“Bainhira estudante ida la hatene sura no lee sílaba, la’ós estudante mak sala, maibé profesór mak falla hodi transmite siénsia ba estudante sira,” nia dehan.
Nia dehan katak rezultadu teste ne’e bele sai baze ba formasaun profesór síklu primeiru, fornesimentu materiál didátiku foun no dezenvolvimentu polítika kurríkulu ne’ebé responde ba nesesidade reál iha terrenu.
“Ita-nia esperansa katak programa hotu ne’ebé governu halo ne’e kontribui ba hadia kualidade edukasaun bázika iha Timor-Leste,” nia hatete.Nia informa katak estudante husi Munisípiu Manatuto ne’ebé sei tuir teste EGRA no EGMA iha tinan 2026 hamutuk na’in 1.234.
