Falintil-Forças de Defesa de Timor-Leste (F-FDTL), liuhusi Komponente Forsa Mariña, dadaun ne’e seidauk iha kapasidade ekipamentu hodi kombate atividade peska ilegál iha kosta súl.
Komandante Komponente Forsa Mariña, Kapitaun Mar no Guerra Comodoru Higino das Neves, dehan katak Timor-Leste iha rikusoin oioin iha tasi, maibé forsa mariña seidauk iha kapasidade atu proteje rikusoin sira-ne’e.
“Atu dehan katak ita-nia forsa mariña dadaun ne’e seidauk iha kapasidade em termos de ekipamentu hodi kombate atividade peska ilegál, liuliu iha área kosta súl nian, nune’e hodi proteje rikusoin sira iha tasi,” nia informa.
Nia dehan katak iha kosta norte, forsa mariña iha kapasidade rekursu umanu no ekipamentu, tanba servisu hamutuk ho Unidade Polísia Marítima (UPM).
“Iha kosta súl kona-ba kapasidade rekursu umanu ita sufisiente, maibé rekursu ekipamentu ita laiha kapasidade hodi kombate peska ilegál,” Comodoru Neves dehan iha JL World, Díli.
Aleinde ne’e, nia dehan katak forsa mariña hato’o ona relatóriu ba governu no governu mós iha ona planu atu sosa ró boot ida ba forsa mariña hodi halo kontrolu iha kosta súl.
Iha parte seluk, Ministru Agrikultura, Pekuária, Peskas no Florestas (MAPPF), Marcos da Cruz, dehan katak tuir dadus ne’ebé iha, Timor-Leste iha potensiál ikan hamutuk tonelada 718.900 iha tasi.
“Husi potensiál ida-ne’e ita foin esplora de’it porsentu rua (2%), husi dadus ne’ebé ita iha kuaze porsentu 20% mak ita lakon ba peska ilegál,” Ministru informa.
Nia dehan katak presiza dezenvolve setór peska, tanba ne’e forsa mariña tenke halo kontrolu másimu hodi kombate atividade peska ilegál no asegura rikusoin iha tasi.
“Ita hatene katak dadaun ne’e sira enfrenta hela menus ekipamentu, maibé ita fiar iha sira ho rekursu ne’ebé natoon sira bele kombate no proteje rikesa tasi nian,” nia dehan.Aleinde ne’e, nia informa katak MAPPF forma ona ekipa ho Ministériu Interior, Polísia Nasionál Timor-Leste (PNTL), forsa mariña no ministériu relevante sira seluk hodi hala’o operasaun ba prevensaun atividade ilegál.
