Komunidade Suku Madohi, Postu-Administrativu Dom Aleixo, Munisípiu Díli, kontinua enfrenta difikuldade atu asesu bee moos, no husu governu atu fó atensaun lalais ba problema refere.
Xefe Suku Madohi, Bernardino de Cristo, hateten katak aldeia lubuk ida iha suku refere seidauk asesu bee moos ho di’ak, inklui Aldeia Loromatan, Naroman, Beto Leste, 7 de Setembro, Anin Fuik no Teras Santana, no katak iha área balun komunidade tenke buka bee husi fatin dook.
“Falta bee mós hamosu difikuldade ba feto no labarik sira, liuliu iha aldeia sira ne’ebé hela dook husi estrada no infraestrutura bázika,” dehan Xefe Suku Bernardino iha nia servisu fatin, Suku Madohi, Díli.
Nia akresenta katak lideransa suku halo ona identifikasaun ba prioridade sira no aprezenta ona ba administrasaun postu no nivel munisípiu, maibé to’o agora seidauk iha implementasaun konkreta atu responde ba problema refere.
“Difikuldade ne’e bele mosu tanba falta orsamentu no rekursu tékniku iha ministériu relevante. Dala ruma programa sira ne’ebé planeadu tenke adia nafatin tanba limitasaun hirak ne’e,” nia hateten.
Tuir informasaun husi suku, antes ne’e ema liu 700 mak seidauk asesu bee moos iha área refere, ne’ebé hatudu katak problema ne’e afeta komunidade barak no presiza intervensaun urjente husi governu.
Iha parte seluk, Diretór Operasionál no Manutensaun iha Bee Timor-Leste (BTL, E.P.), Aleixo dos Santos, hateten katak problema asesu bee moos iha Suku Madohi loos duni, tanba sistema abastesimentu bee iha área refere seidauk adekuadu atu atende nesesidade populasaun.
“Planu ida mak atu hato’o bee husi sistema kanu bee nian ne’ebé mak tuan ona, entaun ita presiza haree uluk, maibé implementasaun sei depende ba preparasaun infraestrutura seluk hanesan eletrisidade no instalasaun téknika,” hateten Aleixo.
Nia dehan katak kondisaun jeográfika no modelu sistema ultra-lokalizasaun iha Suku Madohi sai fatór ne’ebé limita distribuisaun bee.Aleinde ne’e, nia hatutan katak área iha Suku Madohi afetadu husi projetu alargamentu aeroportu, ne’ebé iha impaktu direta ba dezenvolvimentu sistema bee, tanba ne’e presiza akompaña planu governu no buka dalan atu integra Suku Madohi ba sistema abastesimentu bee iha futuru.
