Forsa mariña husi nasaun membru Comunidade dos Países de Língua Portuguesa (CPLP) apoiu Timor-Leste hodi kombate krime tráfiku iha tasi.
Xefe Estadu-Maior Jerál Falintil-Forças de Defesa de Timor-Leste (F-FDTL), Tenente Jenerál Domingos Raul “Falur Rate Laek”, dehan katak krime tráfiku iha tasi mak krime transnasionál, tanba ne’e atu kombate presiza kooperasaun internasionál entre forsa mariña sira, liuliu iha CPLP.
“Forsa mariña iha nasaun membru CPLP apoiu Timor-Leste kombate krime tráfiku tasi,” nia dehan iha konferénsia internasionál mariña da dala sia (9) iha Hotel JL World, Díli.
Nia hatete katak krime tráfiku iha tasi inklui peska ilegál, imigrasaun ilegál, lavagem osan, droga no tráfiku umanu ne’ebé atravessa tasi.
“Atu kombate ida-ne’e ita presiza iha ligasaun internasionál, tanba krime hirak ne’e mai husi nasaun seluk, dala ruma mós Timor-Leste sai fatin destinasaun no tranzasaun ba krime organizadu hirak ne’e,” Xefe Estadu-Maior Jerál F-FDTL, Tenente Jenerál Falur dehan.
Nia informa katak krime hirak ne’e sai ameasa moderna ne’ebé mundu tomak enfrenta, la’ós Timor-Leste de’it, tanba ne’e presiza kombate ho sériu atu labele lori risku ba foin-sa’e sira.
Iha parte seluk, Diretór Ezekutivu Belun, Luis Ximenes, dehan katak krime tráfiku iha tasi realiza husi rede organizadu sira, tanba ne’e atu kombate presiza kooperasaun internasionál.
“Ita tenke hola parte iha organizasaun internasionál sira hanesan CPLP no agora mós ita tama ona ba ASEAN. Iha nasaun estadu membru sira-ne’e mak servisu hamutuk troka ideia hodi kombate krime organizadu hirak ne’e,” nia hatete.
Nia hatete katak kapasitasaun ba membru seguransa sira importante tebes atu kombate kazu tráfiku umanu, nune’e mós presiza ekipamentu detesaun ne’ebé apropriadu.
“Presiza mós investe iha ekipamentu sira liga ho tasi nian, hanesan ró ne’ebé kualidade di’ak, ekipamentu salvamentu no mákina deteta atividade tráfiku tasi nian,” Diretór Ezekutivu Belun Ximenes dehan.
Nasaun membru CPLP hamutuk sia (9), mak Timor-Leste, Portugál, Brazíl, Moçambique, Cabo Verde, Guiné-Bissau, Guiné Ekuatoriál, Angola no São Tomé e Príncipe.
