Diretora Organizasaun Movimentu Feto Foin-sa’e (MOFFE), Yasinta Luijina, husu sosiedade atu labele konsidera informasaun saúde reprodutiva no seksuál hanesan informasaun la di’ak no labele tauk atu ko’alia kona-ba asuntu ne’e iha públiku, tanba foin-sa’e sira iha direitu atu asesu informasaun ne’ebé loos no di’ak.
“Foin-sa’e sira iha direitu hodi hetan informasaun kona-ba saúde reprodutiva no saúde seksuál, nune’e sira bele komprende konsekuénsia sira, liuliu kona-ba isin-rua sedu no moras sira seluk tan ne’ebé bele lori risku ba sira-nia futuru,” nia hatete.
Nia dehan katak família no eskola iha responsabilidade boot atu fahe informasaun kona-ba saúde reprodutiva no seksuál ba foin-sa’e sira atu sira komprende.
“Ita presiza sensibiliza nafatin foin-sa’e sira, haforsa sira-nia koñesimentu kona-ba saúde reprodutiva, tanba isin-lolon ne’e ema ida-idak nian, entaun ema ida-idak mak bele proteje nia isin,” nia hatete.
Aleinde ne’e, nia dehan katak dadaun ne’e moris ona iha era globalizasaun ne’ebé teknolojia sai ona parte ida husi ema nia moris loroloron no katak teknolojia iha vantajen atu peskiza hodi hariku koñesimentu, maibé mós iha desvantajen tanba bele asesu pornografia liuhusi internet, ne’ebé bele kontribui ba isin-rua sedu.
Iha parte seluk, foin-sa’e Angelina Tilman rekoñese katak dadaun ne’e foin-sa’e barak falta koñesimentu kona-ba saúde reprodutiva no la hatene atu ba halo konsulta ho sé bainhira iha problema.
“Ami agradese tebes ba esforsu ne’ebé sosiedade sivíl no parte eskola sira halo hodi fó edukasaun saúde reprodutiva no seksuál ba foin-sa’e, nune’e bele iha koñesimentu kona-ba asuntu ida-ne’e,” nia informa.
Nia dehan katak foin-sa’e barak kaben sedu tanba ladún asesu informasaun ne’ebé loos kona-ba saúde reprodutiva no seksuál hodi orienta sira-nia an ho di’ak.
Nia salienta tan ka foin-sa’e sira ikusmai monu ba relasaun livre ne’ebé rezulta isin-rua sedu hodi lakon sira-nia futuru.
Aleinde ne’e, nia hatete katak presiza halo sensibilizasaun ba foin-sa’e sira, liuliu feto, kona-ba ijiene menstruasaun iha eskola sira, inklui mós edukasaun saúde reprodutiva.
