Komunidade Aldeia Moris ba Dame, Suku Bairu-Pite, Postu-Administrativu Dom Aleixo, Munisípiu Díli, husu Bee Timor-Leste, E.P. (BTL-EP) atu hatudu responsabilidade ba kanu bee moos ne’ebé durante ne’e fornese bee ba área refere.
Reprezentante komunidade, Manuel Savio, hateten katak antes ne’e kanu bee moos la’o di’ak no fornese bee ba uma-kain sira, maibé, situasaun muda depois ekipamentu husi BTL-EP ba halo intervensaun no sobu kanu refere, maibé la hadia fila fali to’o agora.
“Antes ne’e bee la’o normál, maibé depois BTL-EP mai sobu, to’o agora la iha responsabilidade atu hadia fila fali. Ami hein ona besik fulan ida resin atu tama ba fulan rua, maibé seidauk iha solusaun,” dehan Manuel iha Aldeia Moris ba Dame, Ailoklaran, Díli.
Nia hatutan katak kanu la funsiona halo komunidade hasoru difikuldade boot atu asesu bee moos ba nesesidade loroloron, hanesan hemu, tein no fase roupa.
Nia dehan katak komunidade sira tenta ona atu husu ajuda ba parte relevante, maibé tuir informasaun ne’ebé sira simu, iha pedidu atu komunidade kontribui osan atu hadia kanu refere.
“Ami la simu kondisaun ne’e, tanba bee moos ne’e BTL-EP mak mai sobu, kada fulan ami selu tarifa bee tuir metru ne’ebé sira instala ona iha uma-kain sira,” nia dehan.
Komunidade husu BTL-EP atu foti responsabilidade imediata hodi hadia fila fali kanu bee moos, tanba bee moos mak nesesidade báziku ba moris loroloron no saúde komunidade nian.
Iha parte seluk, komunidade Joana de Oliveira Mendonça hateten katak situasaun ne’e halo komunidade moris iha kondisaun difísil tebes, tanba loroloron tenke hadau malu bee husi mota atu sustenta nesesidade loroloron.
“Durante ne’e ami la asesu bee moos, ami tenke ba mota hodi hadau bee, no bee ne’ebé ami kuru iha mota ne’e la seguru ba saúde. Bee Timor-Leste lori bee mai, sira loke tuir oras limitadu de’it, nune’e komunidade barak la hetan,” dehan Joana.
Nia hatutan katak iha tempu balun, kareta tanki sira lori bee moos fa’an tanke ida ho folin USD 30 no situasaun refere halo desigualdade boot iha komunidade, tanba família ne’ebé iha kapasidade finanseira de’it mak bele sosa.
“Ema iha osan mak bele sosa bee. Ami ne’ebé laiha osan labele sosa. Ami iha ne’e labarik barak ne’ebé ba eskola, maibé tanba falta bee, sira hasoru difikuldade atu haris no prepara ba eskola,” nia esplika.
Nia husu Governu, Parlamentu Nasionál, Provedoria Direitus Humanos no Justisa (PDHJ) no organizasaun sosiedade sivíl sira atu fó atensaun séria ba situasaun ne’e, tanba bee moos la’ós previléjiu ida, maibé direitu fundamentál ba sidadaun hotu.
“Ami husu mós ba BTL-EP atu fó esklaresimentu kona-ba diferensa iha pagamentu, tanba iha komunidade balun kontinua selu bee moos, maibé nafatin la hetan fornesimentu regulár,” nia dehan.
Hatán ba preokupasaun ne’e, Diretór Operasionál BTL-EP, Aleixo dos Santos, hateten katak sira-nia ekipa iha terrenu hahú ona rejista komunidade sira ne’ebé la asesu ba bee moos, tanba ne’e BTL-EP sei buka dalan atu rezolve problema refere.
“Ita komesa haree no hahú rejistu ona komunidade sira ne’ebé la asesu ba bee moos. Ita rejistu ona komunidade 100 ida resin, tanba ne’e ita sei dada uluk kanu ba sira-nia área, depois mak ita sei halo instalasaun ba kada uma-kain,” nia dehan.Nia afirma katak komunidade sira atu pasiénsia oituan, tanba fiar katak iha semana ida nia laran sira sei asesu fali ona bee moos hanesan baibain.
