Komunidade sira iha Suku Tibar, Postu-Administrativu Bazartete, iha Município Liquiça, buka moris husi materiál sira ne’ebé sira rekolla iha área lixeira Tibar hodi sustenta moris loroloron.
Xefe Suku Tibar, Marcelino Ananias Corea Lemos, hateten katak dadaun ne’e ema hamutuk na’in-lima-nolu (50) mak hala’o atividade rekolla materiál iha lixeira Tibar hodi halo resiklajen hodi fan fali.
“Fatin ne’e ita komprende katak ne’e lixu fatin. Ita bele mai buka moris iha ne’ebá, tanba hanesan rikusoin segundu no bele buka osan, maibé labele ba toba iha ne’eba ka halo sai hanesan ita-nia uma tanba bele lori risku ba saúde,” dehan Xefe Marcelino.
Xefe Marcelino esplika tan katak iha kompañia rua lokaliza iha área Pantai Kelapa no Tasi Tolu ne’ebé regularmente sosa materiál resiklajen sira husi komunidade iha Tibar.
“Durante ne’e iha kompañia rua mak regularmente mai sosa materiál resiklajen sira husi komunidade. Sira ajuda komunidade atu kontinua hetan rendimentu husi atividade ne’e,” nia hateten.
Husi sorin seluk, komunidade ne’ebé sempre ba rekolla materiál sira iha Lixeira Tibar la koi fó-sai nia naran maibe hateten katak nia servisu loron-loron maka hili no separa botir Aqua mamuk, kalen mamuk no materiál seluk ne’ebé bele fa’an fali ba kompañia sira.
“Ami-nia servisu loron-loron maka hili lata mamuk, aqua mamuk no kalen mamuk sira atu fa’an ba kompañia. Maibé la’ós loron-loron mak ami bele fa’an, tanba depende ba kompañia sira-nia tempu atu mai sosa,” hateten traballadór ne’e.
Nia esplika katak rendimentu husi atividade ne’e sei limitadu, tanba presu materiál resiklajen la aas no kada kilograma ida bele hetan $0,5 sentavus, no iha semana ida de’it sira normalmente bele hetan entre $5 to’o $6.
“Osan ne’ebé ami hetan husi fa’an kalen no aqua mamuk sira-ne’e ami uza ba presiza loron-loron hanesan selu oan sira-nia eskola no ba han hemu,” nia dehan.Nia dehan tan maski rendimentu ne’ebé hetan la boot, komunidade sira ne’ebé hala’o atividade iha lixeira Tibar konsidera fatin ne’e hanesan fonte importante ida ba sira-nia moris.
