Hospitál Nasionál Guido Valadares (HNGV) hahú ona implementa sistema kartaun dijitál atu moderniza servisu saúde, aumenta efisiénsia atendimentu, proteje dadus pasiente no fasilita komunikasaun entre profisionál saúde sira.
Diretór Ezekutivu HNGV, Nuno Vital Soares, hateten katak sistema foun ne’e sei permite pasiente hotu-hotu atu uza kartaun dijitál bainhira halo tratamentu.
“Agora pasiente sira ne’ebé halo rejistu sei simu kartaun dijitál no la presiza ona halo rejistu manuál hanesan uluk. Sistema ne’e sei ajuda atu organiza informasaun ho di’ak liu no fasilita atendimentu,” dehan Diretór Nuno Vital iha HNGV, Díli.
Nia esplika katak sistema dijitál ne’e sei substitui métodu rejistu manuál ne’ebé uza durante tinan barak, ne’ebé dala ruma lori atrasu no risku perda dadus.
“Ha’u sei la haree ita-boot nia dadus iha arkivu. Bainhira pasiente ida mai, ha’u sei la haree nia moras saida, tanba pasiente no médiku ne’ebé atende de’it mak bele hatene. Ida-ne’e atu garante privasidade no konfiansa pasiente sira,” nia hateten.
Nia informa katak implementasaun sistema dijitál ne’e sei hala’o tuir faze. Iha etapa dahuluk, programa pilotu sei foka iha HNGV hanesan sentru referénsia nasionál. Depois husi avaliasaun no ajustamentu, sistema ne’e sei estende ba ospitál rejionál no sentru saúde iha munisípiu hotu-hotu.
Diretór Nuno akresenta katak HNGV kontinua dezenvolve kapasidade rekursu umanu atu garante sistema ne’e bele funsiona ho efetivu. Formasaun espesífiku fó ona ba médiku, enfermeiru no pesoál tékniku sira atu bele uza teknolojia dijitál, inklui sistema informasaun saúde no telemedisina. Inisiativa ne’e hetan apoiu husi Organizasaun Mundiál Saúde (OMS).
Iha parte seluk, pasiente Domingas Amaral hateten katak nia sente kontente ho sistema kartaun dijitál tanba bele fasilita prosesu atendimentu no reduz tempu hein.
“Ami la presiza ona atu tau fali naran dala barak. Bainhira mai, uza de’it kartaun no prosesu sai lalais liu,” dehan nia.
Nia mós husu atu reforma sistema ne’e la’ós foka de’it ba teknolojia, maibé tenke fó atensaun ba kualidade servisu no disponibilidade rekursu saúde, liuliu ai-moruk.“Pesoál saúde tenke kontinua fó atendimentu ho di’ak. Maski iha ona sistema dijitál, maibé bainhira ai-moruk la iha, entaun seidauk muda buat barak ba ami,” nia hateten.
