Xefe Estadu-Maior Jerál Falintil-Forças de Defesa de Timor-Leste (F-FDTL), Tenente Jenerál Domingos Raul “Falur Rate Laek”, husu governu atu moderniza ekipamentu hodi kombate krime online, liuliu scamming call center iha Timor-Leste.
Tenente Jenerál Falur dehan katak krime scamming call center mak krime organizadu ne’ebé la fasil atu deteta, tanba presiza tempu naruk no molok deteta, ema barak sai ona vítima.
“Ita husu governu tenke investe hodi moderniza ekipamentu hodi kombate krime online scamming call center,” nia dehan.
Nia hatete katak la’ós moderniza ekipamentu de’it, maibé tenke investe mós iha rekursu umanu atu utiliza ekipamentu modernu sira, hodi fasilita servisu prevensaun ho lalais nune’e ema barak labele sai vítima.
“Ita-nia instituisaun defeza no seguransa sei menus ekipamentu modernu no nune’e mós kapasitasaun hodi utiliza ekipamentu teknolojia modernu hodi ita antisipa ba sasan sira-ne’e,” Tenente Jenerál Falur hatete iha JL World, Díli.
Nia dehan tan katak maski dadaun ne’e instituisaun sira seidauk iha ekipamentu modernu, maibé nia apresia rezultadu operasaun ne’ebé hala’o hodi kaptura no loke prosesu ba suspeitu sira iha kazu refere.
Entretantu, Ministru Interior, Francisco da Costa Guterres, antes ne’e dehan katak modernizasaun ekipamentu ba Polísia Nasionál Timor-Leste (PNTL) tama ona iha prioridade governu nian, maibé sei implementa fazeadamente no la bele rezolve dala ida de’it.
“Ita hahú rezolve ona ekipamentu sofistikadu balun hodi moderniza sira-nia servisu kombate sira, maibé ita rekoñese seidauk sufisiente,” nia salienta.
Nia dehan katak governu sei esforsu nafatin hodi kompleta ekipamentu nesesáriu sira atu moderniza servisu PNTL hodi kombate krime transnasionál sira, inklui scamming call center iha rai-laran.
“Ita enkoraja nafatin polísia sira atu servisu tuir ordem komandu hodi kombate krime organizadu sira ho ekipamentu no kapasidade ne’ebé sira iha,” Ministru Guterres dehan iha Palásiu Governu.Aleinde ne’e, nia dehan katak governu koopera ona ho parseiru sira hodi apoiu formasaun kona-ba identifikasaun ba krime organizadu sira iha Timor-Leste.
