Ministériu Edukasaun (ME) dadaun ne’e moderniza ona Eskola Sekundária Tékniku Vokasionál (E-STV) Agríkola Kay-Rala Xanana Gusmão Oe-Cusse liuhusi distribuisaun ekipamentu eletróniku hodi apoiu prosesu aprendizajen loroloron.
Sekretáriu Estadu Ensinu Sekundáriu Tékniku Vokasionál no Ensinu Sekundáriu Jerál, Domingos Lopes Lemos, hatete katak E-STV sira presiza tebes moderniza, tanba husi E-STV mak prepara estudante sira atu responde ba merkadu traballu iha futuru.
Nia dehan katak ME distribui ona ekipamentu modernizasaun ba maioria E-STV, maibé balun seidauk kompletu, inklui E-STV Agríkola Kay-Rala Xanana Gusmão Oe-Cusse.
“Ohin ita moderniza ona E-STV Agríkola ne’e liuhusi ekipamentu eletróniku ne’ebé distribui hodi fasilita sira moderniza prosesu aprendizajen loroloron,” Sekretáriu Estadu E-STV no ESG Lemos informa.
Nia dehan katak ekipamentu ne’ebé distribui mak komputadór unidade neen (6) no mákina imprime ida (1) ba eskola refere.
“Apoiu ne’e ho objetivu atu moderniza prosesu aprendizajen no ensinu iha sala de aula, hametin utilizasaun teknolojia iha edukasaun, no mós atu aselera no fasilita sistema administrasaun eskolár, hodi hasa’e efisiénsia servisu no kualidade edukasaun iha eskola,” nia hatete.
Nia dehan katak maski ekipamentu ne’e seidauk kompletu, maibé husu eskola atu utiliza lai ekipamentu ne’ebé iha, no ME nafatin esforsu atu kompleta tan bainhira presiza.
Iha parte seluk, Koordenadór Timor-Leste Coalition for Education (TLCE), José Monteiro, dehan katak ME tenke investe iha E-STV sira hodi kontribui ba hadia kualidade edukasaun iha Timor-Leste.
Nia dehan katak tuir monitorizasaun ne’ebé sira halo espesífiku ba E-STV, la’ós E-STV Agríkola Kay-Rala Xanana Gusmão de’it mak seidauk iha ekipamentu modernizasaun, maibé eskola seluk mós laiha.
“Ita haree la’ós falta de’it ekipamentu prátika, maibé infraestrutura mós la di’ak, inklui kolokasaun profesór sira mós fallansu,” nia hatete.
Nia hatete katak atu moderniza E-STV, kada tinan ME investe liuhusi ezekusaun orsamentu hodi hasa’e kualidade no prepara estudante sira asesu ba kampu traballu, nune’e mós kria rasik kampu traballu iha futuru.
“Ekipamentu modernu ne’ebé distribui ba E-STV ne’e kontribui tebes ba kualidade edukasaun, tanba estudante sira aprende teoria no prátika kedas, no kada tinan sira sempre sai primeiru lugar iha Ezame Nasionál,” Koordenadór TLCE Monteiro informa.
Aleinde ne’e, nia dehan katak ME presiza identifika tan E-STV sira ne’ebé sei falta ekipamentu modernu, nune’e bele aselera distribuisaun, tanba la’ós E-STV Agríkola ne’e de’it mak presiza, maibé eskola seluk mós presiza.Dadaun ne’e, E-STV ne’ebé eziste iha Timor-Leste hamutuk 36, kompostu husi E-STV Agríkola, Mekánika, Eletrisidade, Konstrusaun, Ospitalidade no Turizmu.
