Institutu Nasionál Kombate HIV-SIDA (INCSIDA) kontinua hala’o sensibilizasaun ba kandidatu traballadór migrante Timor-oan sira ne’ebé atu bá servisu iha Austrália, hodi hasa’e sira-nia koñesimentu kona-ba prevensaun moras HIV-SIDA no risku saúde bainhira hela iha rai-liur.
Prezidente INCSIDA, Daniel Marçal, hatete katak informasaun kona-ba HIV-SIDA importante tebes, liuliu ba joven sira ne’ebé sei bá servisu iha estranjeiru.
“Sensibilizasaun ida-ne’e atu asegura katak kandidatu traballadór sira hetan informasaun klaru kona-ba HIV-SIDA. Informasaun ida-ne’e importante tebes, tanba risku ba sira-nia moris sei aumenta bainhira la iha edukasaun adekuadu kona-ba prevensaun moras ne’e,” dehan Marçal iha Pantai Kelapa, Díli.
Nia hatete katak atividade sensibilizasaun refere realiza liuhusi koordenasaun ho Sekretariadu Estadu Formasaun Profisionál no Empregu (SEFOPE), nune’e mós ajénsia sira ne’ebé responsável ba prosesu preparasaun traballadór migrante sira.
Nia esplika tan katak esperiénsia iha tinan sira kotuk hatudu katak iha traballadór balun ne’ebé bá rai-liur ho kondisaun saúde di’ak, maibé fila mai ho problema saúde, tanba la konsegue kontrola sira-nia estilu moris, liuliu iha aspetu moris seksuál no utilizasaun osan ho maneira ne’ebé la produtiva.
“INCSIDA ho SEFOPE sei kontinua reforsa koordenasaun atu integra edukasaun saúde iha programa Pre-Departure Briefing (PDB), ho objetivu atu asegura katak traballadór sira hotu hetan informasaun kona-ba prevensaun HIV-SIDA, inklui oinsá atu evita prátika seksuál ne’ebé la seguru, uza proteksaun no halo desizaun responsável bainhira hela iha rai-liur,” dehan Marçal.
Iha parte seluk, reprezentante kandidatu traballadór Austrália, Holmes Guterres, hatete katak formasaun refere ajuda tebes sira atu komprende risku moras HIV-SIDA no oinsá atu prevene an husi vírus refere.
“Formasaun ne’e importante tebes tanba fó informasaun klaru ba ami atu prevene an. Agora ita haree katak kazu HIV-SIDA iha Timor-Leste mós aumenta. Nune’e informasaun ida-ne’e sai hanesan medida importante atu proteje ami-nia saúde, liuliu ba joven sira ne’ebé atu bá servisu iha liur,” nia dehan.
Nune’e mós, Koordenadór Pre-Departure Briefing (PDB), Agustinho Maia, hatete katak SEFOPE sei kontinua halo akordu ho INCSIDA atu organiza oráriu regulár ba sesaun sensibilizasaun, hodi asegura katak kandidatu traballadór migrante hotu simu edukasaun kona-ba HIV-SIDA antes partida.
“Traballadór migrante Timor-oan sira bele sai hanesan ema ne’ebé informadu, responsável no saudável, no bele evita transmisaun HIV-SIDA no moras seluk ne’ebé bele ameasa sira-nia moris iha futuru,” nia dehan.Nia dehan katak programa refere importante tanba la’ós prepara traballadór sira iha aspetu profisionál de’it, maibé mós iha aspetu saúde no moris sosiál, atu nune’e bele evita risku sira ne’ebé bele akontese durante servisu iha rai-liur.
