Governu liuhusi Ministériu Agrikultura, Pekuária, Peskas no Florestas (MAPPF) fó ona autorizasaun ba kompañia nasionál rua (2), Rayhana no Comodities X Change, Lda., hodi realiza atividade peska iha tasi Timor-Leste.
Ministru MAPPF, Marcos da Cruz, dehan katak atribuisaun lisensa ba kompañia lokál rua (2) ne’e hodi fó oportunidade ba emprezáriu nasionál sira atu partisipa diretamente iha dezenvolvimentu setór peska.
“Ho razaun ida-ne’e mak governu autoriza kompañia lokál rua (2), hanesan Rayhana no Comodities X Change, Lda., hodi realiza atividade peska iha tasi Timor-Leste,” nia informa.
Nia dehan katak rezultadu peska ne’ebé kompañia lokál rua (2) ne’e halo sei tau iha kooperativa ne’ebé sei kria atu fa’an fila fali hodi kontribui reseita ba kofre Estadu.
“Ró ne’ebé kompañia rua-ne’e uza hamutuk haat (4), kompostu husi ró rua (2) pertense ba Rayhana, ida (1) ba Comodities X Change, Lda., no ida (1) pertense ba governu,” nia dehan.
Nia dehan tan katak ró governu nian sei uza atu monitoriza no kontrola atividade ró peska sira ne’ebé simu lisensa, nune’e mós apoiu fiskalizasaun ba peskadór sira.
Entretantu, na’in ba Kompañia Rayhana, Ricardo Nheu, dehan katak IX Governu Konstitusionál fó oportunidade ba emprezáriu nasionál sira atu investe iha setór peska.
“Ami kompromete sei hala’o atividade ho responsabilidade no servisu hamutuk ho entidade relevante sira atu hadi’a difikuldade ne’ebé bele mosu bainhira iha atividade peska,” nia salienta.
Aleinde ne’e, nia dehan katak governu mós entrega sertifikadu lisensa no ekipamentu GPS ba ró sira atu fasilita monitorizasaun no kontrolu atividade peska.
Iha parte seluk, Diretór Ezekutivu Belun, Luis Ximenes, hatete katak governu la’ós fó lisensa atu kaer ikan de’it, maibé tenke haree mós oinsá produtu peska sei distribui no transforma atu aumenta valór ekonómiku, la’ós fa’an ikan fresku de’it iha merkadu.
“Tuir planu ne’ebé iha katak ró hirak ne’e sei ba kaer ikan kada semana rua (2). Karik lori ikan barak ne’e mai Díli, tenke iha planu atu prosesa no preparasaun ba merkadu,” nia salienta.Nia dehan katak governu tenke prepara uluk fatin atu nune’e ikan hirak ne’e bele susesu iha merkadu nasionál, la’ós fa’an tun-sae iha dalan ninin sira.
