Servisu Edukasaun Munisípiu Liquiça (SEML) identifika ona eskola hamutuk 63 ne’ebé presiza reabilitasaun ka konstrusaun foun, tanba kondisaun infraestrutura refere representa risku ba seguransa estudante no profesór sira.
Diretór SEML, Júlio da Silva, hatete katak eskola 63 ne’ebé identifika ne’e inklui ensinu pré-eskolár, ensinu báziku, sekundáriu jerál no tékniku vokasionál, ne’ebé iha kondisaun grave.
“Infraestrutura eskolár 63 ne’e presiza konstrusaun hanesan reabilitasaun no konstrusaun foun,” nia dehan liuhusi telefone.
Nia dehan katak Servisu Edukasaun Munisípiu Liquiça hato’o ona pedidu ba Ministériu Edukasaun (ME) atu halo intervensaun lalais molok tama tempu udan no anin, tanba kondisaun eskola sira-ne’e representa risku ba ema-nia vida.
“Ita presiza prepara fatin ne’ebé seguru ba ita-nia oan sira atu nune’e sira bele partisipa iha prosesu aprendizajen ho di’ak no livre husi risku sira ne’ebé ita la espera,” Diretór SEML Silva informa.
Aleinde ne’e, nia dehan katak problema ne’ebé eskola sira iha Munisípiu Liquiça enfrenta dadaun ne’e mak kondisaun infraestrutura eskolár no falta fasilidade eskola seluk.
“Eskola hirak ne’e maioria iha área remota no nia distánsia ne’e dook malu tebes,” nia salienta.
Entretantu, Ministra Edukasaun, Dulce de Jesus Soares, dehan katak eskola 63 husi Munisípiu Liquiça tama ona iha lista konstrusaun eskola hamutuk 1.000 iha territóriu tomak.
“Husi lista hirak ne’e ita rezolve etapa por etapa, tuir orsamentu ne’ebé ME iha, maibé ita sei esforsu atu bele rezolve uluk sira ne’ebé tama iha kondisaun grave liu,” nia dehan.
Nia dehan katak konstrusaun refere atu responde ba eskola sira ne’ebé iha kondisaun la di’ak no eskola sira ne’ebé menus sala aula iha territóriu laran.
“Eskola hirak ne’e sei kompleta no fasilidade eskola nian hanesan karteira eskolár hodi fasilita estudante sira partisipa prosesu aprendizajen,” Ministra Soares informa.Nia hatete katak konstrusaun eskola balun hahú ona, balun seidauk, maibé governu promete atu finaliza ho lalais hodi fasilita estudante sira.
