Estabelesimentu Akademia Militári iha Munisípiu Aileu atu hala’o formasaun hodi prepara foin-sa’e sira nune’e bele implementa servisu ne’ebé modernu liu iha instituisaun Falintil-Forças de Defesa de Timor-Leste (F-FDTL) iha futuru.
Diretór Akademia Militár, Kapitaun Fragata Duarte Borges Loe, dehan katak kurríkulu ne’ebé sei implementa iha formasaun Akademia Militár sei la foka deit ba formasaun militár tradisionál ba foin-sa’e sira.
“Iha kurríkulu Akademia Militár ne’e iha de’it formasaun ne’ebé modernu,” nia hatete.
Nia dehan katak formasaun modernu ne’e inklui oinsá sira aprende uza teknolojia ba planeamentu operasaun, aprende kona-ba seguransa, defeza rejionál no globál, no aprende diplomásia hodi halo kooperasaun ho nasaun seluk.
“Husi formasaun ne’ebé foin-sa’e sira hetan iha Akademia Militár ne’e atu prepara sira lidera instituisaun F-FDTL ne’ebé modernu liu iha futuru,” Diretór Akademia Militár Kapitaun Fragata Loe hatete iha Arkivu no Muzeu Rezisténsia, Díli.
Nia informa katak iha Akademia Militár, aleinde formasaun militár, iha mós formasaun sívika no prátika, no kurríkulu ne’e sei halo mós adaptasaun husi nasaun seluk ne’ebé iha ona akademia militár.
Entretantu, Prezidente Komisaun Rekrutamentu Kadetes Foun Akademia Militár, Nuno Manuel Corvelo de Andrade Sarmento, dehan katak kadete foun ne’ebé pasa ona teste sira hodi prepara tama ba Akademia Militár iha tinan letivu primeiru hamutuk 66.
“Kadete 66 ne’e sei halo teste aptidaun iha asrama durante loron sanulu (10). Sé mak tahan sei hela, la tahan bele fila, maibé ita fiar katak sira na’in 66 ne’e bele tahan no hela hodi kontinua formasaun ba tinan letivu primeiru,” nia informa.
Nia dehan katak teste hotu komisaun finaliza ona no sei entrega ba Akademia Militár iha tempu besik.
Iha parte seluk, Diretór Organizasaun Naun-Governamentál Belun, Luis Ximenes, dehan katak Akademia Militár tenke haree mós ba nesesidade rai-laran hodi hatán ba asuntu seguransa sira.
“Asuntu seguransa interna no esterna, nune’e mós harii relasaun bilaterál no kona-ba asuntu peskiza nian, tanba militár ida agora ne’e modernu tebes,” nia hatete.
Aleinde ne’e, nia dehan katak dadaun ne’e Timor-Leste merese duni atu estabelese Akademia Militár hodi prepara futuru lideransa F-FDTL ho sistema modernu.
