Eventu kompetisaun internasionál Association of Southeast Asian Nations (ASEAN)+3 ne’ebé envolve estudante ensinu báziku sira iha rejiaun ASEAN, realiza iha Filipinas no kontribui ba dezenvolvimentu kualidade edukasaun iha Timor-Leste.
Ministra Edukasaun, Dulce de Jesus Soares, dehan katak eventu internasionál ASEAN+3 ne’e envolve estudante sira husi nivel ensinu báziku iha rejiaun ASEAN hodi partilla koñesimentu kona-ba siénsia, kreatividade, inovasaun no hametin kolaborasaun iha área siénsia no sustentabilidade bazeia ba Kurríkulu Nasionál Ensinu Báziku nian.
“Ministériu Edukasaun (ME) konsidera eventu ASEAN+3 ne’ebé estudante ensinu báziku sira partisipa iha Filipinas ne’e kontribui tebes ba dezenvolvimentu kualidade edukasaun iha Timor-Leste,” nia dehan.
Nia hatete katak partisipasaun iha eventu internasionál sira hatudu kualidade edukasaun iha Timor-Leste hahú muda kada tinan.
“Husi eventu ne’ebé ita-nia estudante no manorin sira husi ensinu báziku partisipa, lori fila saida mak sira hetan iha eventu ne’e hodi mai partilla iha kada eskola, liuliu kona-ba siénsia, kreatividade, inovasaun hodi halo kolaborasaun bazeia ba ita-nia Kurríkulu Nasionál Ensinu Báziku nian,” dehan ME Soares iha Vila-Verde, Díli.
Nia informa katak partisipasaun iha eventu ne’e reprezenta kompromisu ME nian atu promove aprendizajen sientífika, pensamentu krítiku, kreatividade no dezenvolvimentu kapasidade estudante sira atu partisipa iha kompetisaun internasionál.
“Ita-nia estudante sira ne’ebé partisipa iha eventu ne’e mak Alandrinho Corbafo Caunan husi Kolejiu Paulo VI, Munisípiu Díli; Angelica da Costa Sequeira husi EBC Bidau Akadiruhun, Munisípiu Díli; Mendelina del Carmen Mascarenhas husi EBC 30 de Agostu, Munisípiu Díli; Nelia Patricio Soares husi EBC São Pedro, Munisípiu Díli; Peter Carlos Chima Anaje husi EBC São José Operário, Munisípiu Díli; no Salvador da Costa Pacheco husi EBC Esperança da Pátria, Munisípiu Díli,” nia informa.
Nia dehan katak professora ne’ebé akompaña estudante sira mak Alegrina de Jesus husi EBC Akadiruhun no Helena de Sousa Amaral husi EBC Esperança da Pátria.
Timor-Leste hetan medalla ouro ida (1), medalla prata tolu (3) no medalla bronze rua (2). Timor-Leste mós hetan rekoñesimentu espesiál Best in Estimating Carbon Footprint, Best in Wings of Chance Challenge, Katuklas Excellence Award ba deskobrimentu sientífiku ne’ebé foun no orijinál, Kaugnay Excellence Award ba exelénsia iha servisu hamutuk no respeitu ba kultura, no Kaisa Excellence Award ba advokasia ne’ebé forte ba asaun klimátika.
Iha parte seluk, Angelica da Costa Sequeira dehan katak difikuldade ne’ebé sira enfrenta iha kompetisaun ne’e mak língua no utilizasaun ekipamentu eletróniku durante prosesu kompetisaun.
“Maski ami hasoru difikuldade, maibé ami nafatin esforsu hodi hatudu matenek ne’ebé ami iha no ikusmai ami konsege hetan medalla no lori fila mai Timor-Leste,” nia hatete.
Nia dehan katak iha kompetisaun ne’e sira hasoru nasaun sira ne’ebé avansadu no iha dezenvolvimentu edukasaun di’ak tebes, maibé sira mós esforsu hodi partilla matenek ne’ebé sira iha.Aleinde ne’e, nia sujere ba ME atu hadia asesu estudante sira ba ekipamentu eletróniku iha eskola, nune’e bainhira partisipa iha eventu sira hanesan ne’e labele mosu tan difikuldade.
