Sekretariadu Estadu Igualdade no Inkluzaun (SEII) rejista ona feto potensiál hamutuk na’in 18 mak lidera suku iha munisípiu sia (9) iha territóriu nasionál.
Sekretária Estadu SEII, Elvina Sousa Carvalho, hateten katak Lei Númeru 9/20216 fó espasu ba partisipasaun feto iha eleisaun suku nian, no tanba ne’e, iha eleisaun suku tinan 2023, feto hamutuk na’in 241 mak kompete.
“Husi feto potensiál hamutuk na’in 241 ne’ebé kompete ho mane sira iha eleisaun suku ne’e, iha na’in 18 mak eleitu hodi lidera suku,” nia dehan.
Nia dehan katak feto potensiál na’in 18 ne’ebé dadaun ne’e lidera suku, mak iha Munisípiu Aileu na’in haat (4), Ainaro ida (1), Baucau haat (4), Bobonaro ida (1), Covalima ida (1), Díli tolu (3), Ermera ida (1), Manatuto rua (2) no Manufahi ida (1).
“Ita haree númeru ne’e hatudu katak feto sira iha interese atu sai lideransa lokál, liuliu xefe suku no xefe aldeia, inklui estrutura suku tomak, tanba sei iha delegada-delegadu no reprezentante juventude feto no mane,” nia informa.
Nia dehan katak dadaun ne’e governu kontinua servisu hamutuk ho parseiru nasionál no internasionál sira hodi hasa’e kapasidade feto potensiál sira no enkoraja sira atu kompete iha eleisaun sira ne’ebé sei tuir mai.
Entretantu, Prezidente Asosiasaun Feto Potensiál Munisípiu Baucau, Regina de Sousa, dehan katak Munisípiu Baucau iha suku 59 no feto na’in 25 mak kandidata an ba xefe suku, husi Postu-Administrativu Baguia na’in tolu (3), Laga rua (2), Venilale neen (6), Quelicai neen (6), Vemasse rua (2) no Baucau Vila lima (5).
“Ita-nia feto hamutuk na’in 25 ne’ebé kandidata an ne’e, iha na’in haat (4) mak eleitu hodi lidera suku,” nia informa.
Nia hatete katak dadaun ne’e asosiasaun kontinua enkoraja maluk feto sira, liuliu iha Munisípiu Baucau, atu partisipa iha formasaun sira nune’e bele prepara an hodi kompete.
“Ita asosiasaun nia papél mak realiza formasaun kona-ba lideransa ba maluk feto sira, oinsá atu lidera. Nune’e sira bele prepara an antes molok kompete iha eleisaun,” nia hatete.
Nia hatete katak liuhusi formasaun bele aumenta númeru partisipasaun feto iha eleisaun, nune’e mós aumenta feto ne’ebé lidera suku.
