Ministériu Saúde (MS), liuhusi Diresaun-Jerál Servisu Ospitalár, iha kolaborasaun ho parseiru dezenvolvimentu UNICEF, introdús ona teknolojia Steriliwave (microwave) atu hadia sistema jestaun lixu saúde ho maneira ne’ebé seguru no sustentável iha ospitál sira iha Timor-Leste.
Diretór-Jerál (DG) Servisu Ospitalár iha MS, Raimundo dos Santos, hateten katak teknolojia microwave iha vantajen barak kompara ho insineradór, tanba bele trata lixu infesiozu sira ho maneira ne’ebé la kria suar ka poluente ba anin.
“Microwave nia mekanizmu mak uza manas no evaporasaun atu oho mikróbiu, baktéria no vírus iha lixu saúde nian, diferente ho sistema sunu, ne’ebé bele prodús suar no poluisaun. Teknolojia ida-ne’e la fó impaktu negativu ba komunidade, pesoál saúde no pasiente sira,” dehan DG Raimundo iha Hospitál Nasionál Guido Valadares (HNGV), Díli.
Nia esplika katak teknolojia ne’e permite lixu infesiozu sira tama iha kontentór, depois liuhusi prosesu hamanas ne’ebé aas atu oho organizmu perigu sira molok soe ba lixeira.
Nia haktuir mós katak ho dalan ida-ne’e, risku kontaminasaun ba komunidade no ambiente bele redús signifikativamente.
Nia mós hatete katak governu, ho apoiu finanseiru besik USD 800.000, instala ona ekipamentu sira-ne’e iha HNGV no ospitál rejionál sira seluk no katak iha HNGV, kapasidade mákina to’o litru 250, ne’ebé bele trata lixu mínimu kilograma 40 kada vez, enkuantu iha ospitál rejionál sira kapasidade besik litru 100.
Iha parte seluk, Reprezentante UNICEF iha Timor-Leste, Patrizia DiGiovanni, hateten katak parseria ho governu importante tebes atu hadia kualidade servisu saúde, liuliu ba populasaun vulnerável sira.
“Ekipamentu ne’e sei permite tratamentu lixu infesiozu ho maneira seguru liu no amigável ba ambiente, hodi hamenus risku ba profisionál saúde sira, pasiente, traballadór lixu no komunidade besik ospitál sira,” dehan Patrizia.
Nia dehan katak UNICEF nia apoiu la limita de’it ba fornesimentu ekipamentu, maibé inklui mós instalasaun, formasaun ba tékniku sira no apoiu tékniku durante tinan rua (2) oin mai atu garante operasaun no manutensaun ne’ebé di’ak.
Nia afirma katak UNICEF mós ajuda reabilita fasilidade armazenamentu lixu saúde iha ospitál referénsia lima (5), inklui konstrusaun fatin foun iha HNGV atu asegura jestaun lixu ne’ebé seguru no ordenadu.Aleinde ne’e, nia espera katak implementasaun teknolojia Steriliwave sei sai pasu importante ida atu haforsa sistema saúde Timor-Leste, hodi proteje saúde públika no ambiente, no hadia kondisaun servisu ba pesoál saúde sira iha futuru.
