Eskola Sekundária Téknika Vokasionál Informátika (ESTV-IT) 28 Novembru, Bekora, Díli, enfrenta falta profesór iha área espesífika sira hodi hanorin estudante sira.
Diretór ESTV-IT 28 Novembru, Tomás Pinto, dehan katak dadaun ne’e eskola refere sei falta profesór ba área espesífika hanesan arte gráfika, eletrónika, eletrisidade no informátika.
“Ita sei falta profesór ba iha área espesífika hirak ne’e, tanba ne’e ita presiza aumenta profesór sira ne’ebé iha kapasidade ba iha área ne’ebé ita presiza hodi prepara foin-sa’e sira asesu ba kampu servisu depois de remata estudu,” nia hatete.
Nia dehan katak kolokasaun profesór ne’ebé Ministériu Edukasaun (ME) halo antes ne’e foka de’it ba matéria jerál sira, enkuantu ba matéria espesífika iha departamentu hirak ne’e seidauk iha profesór natoon.
“Ami sei menus profesór, tanba ne’e husu ba ME atu halo rekrutamentu ba profesór iha área espesífika sira hodi responde ba ESTV sira ne’ebé menus profesór ba área produtiva sira,” Diretór Pinto informa.
Nia dehan katak estudante sira iha ESTV-IT kontinua hala’o prosesu aprendizajen loroloron hanesan baibain, maibé atividade ba matéria espesífika sira ladún ativu tanba falta profesór.
“Dadaun ne’e ita iha profesór hamutuk 36 no matéria produtiva ita iha profesór na’in 12, la sufisiente hodi hanorin estudante sira, ho totál estudante ativu 335 kompostu husi departamentu arte gráfika, eletrónika, eletrisidade no informátika,” nia informa.
Aleinde ne’e, nia mós husu atu fó formasaun kontínua ba profesór sira hodi hasa’e sira-nia kapasidade atu hanorin estudante sira.
Entretantu, Diretór Nasionál Rekursu Umanu iha ME, João Amaral, dehan katak kolokasaun profesór ne’ebé ME hala’o durante ne’e bazeia ba kuadru pesoál profesór nian.
“Profesór ne’ebé ita koloka ona ba iha Eskola Ensinu Sekundáriu Tékniku Vokasionál (ESTV) hamutuk 700 hodi koloka ba ESTV hamutuk 36 iha territóriu laran,” nia hatete.
Nia hatete katak maski ME koloka ona profesór sira, eskola balun nafatin enfrenta problema falta profesór, no katak ME kria ona ekipa ida hodi identifika eskola sira ne’ebé menus profesór atu bele halo rekolokasaun.
“Ita mós sei identifika uluk eskola sira-ne’e nia nesesidade, hafoin ita halo kolokasaun,” Diretór Nasionál Amaral informa.Nia garante katak ME sei rezolve problema falta profesór iha tempu besik, nune’e estudante sira labele sai vítima, tanba ensinu tékniku vokasionál la’ós teória de’it, maibé prátika mós importante.
