Atu reduz kazu asidente tráfiku iha kapitál Díli, Diresaun Nasionál Seguransa Rodaviária (DNSR) servisu hamutuk ho Polisía Tránzitu Munisipiu Díli halo sensibilizasaun ba komunidade hodi utiliza estrada ho loloos tuir lei kódigu estrada númeru 6/2003.
Diretór DNSR Elder Soares hatete, bazeia ba asidente tráfiku ne’ebé kontinua akontese kauza mós husi utiliza estrada, tanba iha komunidade barak mak seidauk hatete utiliza estrada ho loloos liga ba sinais tránzitu sira ne’ebé koloka no regula iha lei.
“Atu reduz asidente tráfìku iha kapítal, DNSR servisu hamutuk ho Polisía Tránzitu Munisípiu Díli hodi eduka komunidade sira utiliza estrada ho loloos no respeita sinais tránzitu sira,” nia dehan.
Nia hatete, edukasaun ne’e ekipa realiza ne’e liuhusi atividade sosializasaun ne’ebé ekipa konjunta halo iha estrada publikú sira hodi hasa’e komunidade sira-nia koñesimentu kona-ba sinais tranzitu sira nune’e bele kontribui ba redusaun asidente.
“Sinais tranzitu sira ne’ebé koloka iha estrada sira hanesan sinal ida hatudu mai ita ka oriente ita atu utiliza estrada ho loloos,” nia hatete.
Nia hatete, sinais hirak ne’e ida-idak ho nia sentidu rasik hanesan, zebra croos ne’e hodi fasilita ema hodi ultrapasa iha estrada, tanba ne’e bainhira besik iha zebra croos karreta ka motorizada tenke halai neineik ka para atu ema atravesa, lampu-merah fó espasu ba ema no movimentu karreta ka motorizada sira iha dalan kruzamentu sira.
“Durante ne’e ita haree komunidade sira seidauk hatene atu utiliza nune’e mós motorista sira, balun hatene maibé finzidu hodi kuntinua kontra sinais hirak ne’e,” Diretór DNSR Soares informa.
Aleinde ne’e sosializasaun ida ne’e la’ós de’it ba prevensaun asidente tráfiku, maibé hodi hamenus mós engarafamentu.
Entretantu Komunidade Pasquela da Silva husi Suku Bidau Santana, dehan, loos duni katak komunidade sira la dun hatene kona-ba utiliza estrada ho loloos tuir lei, tanba durante ne’e laiha sosializasaun.
“Ita fó ezemplu ki’ik kona-ba zebra croos komunidade sira atravesa estrada lautiliza zebra croos maske besik hela sira, nune’e mós motorista sira besik ona zebra croos ema ultrapasa hela mós sira konduz karreta ka motorizada lansadu mai de’it,” nia dehan.
Nia hatete, sosializasaun ne’ebé mak dadaun ne’e polísia sira halo iha dalan públiku ema hirak ne’ebé mak sai ba paz sosializasaun ne’e mak sira hatene, balun ne’ebé iha uma de’it la hatete.
“Sosializasaun ne’e presiza ba iha kada suku atu nune’e komunidade hotu bele partisipa nune’e bainhira utiliza estrada karik ho lolos no tuir lei,” komunidade Silva dehan.Enkuantu durante ne’e asidente tráfiku ne’e akontese iha sinais tránzitu sira iha kapital Díli hamutuk ualu (8) hanesan iha zebra croos área Elemloi nian, lampu merah Kaikoli, Eletrisidade Timor-Leste (EDTL) nian, iha zebra croos Aimutin, lampu-merah Colmera nian no seluk tan.
