Transporte Públiku hanesan bus sira ne’ebé halo sirkulasaun husi munisípiu mai kapitál Díli tenke para de’it iha terminál ne’ebé governu prepara ona, bainhira la para sei multa osan ho montante $45 ba kofre estadu.
Xefe Seksaun Manutensaun Sinais Tránzitu iha Diresaun Nasionál Transporte Terrestre (DNTT), João da Silva, dehan governu hasai ona sirkular hodi alerta ba motorista sira husi munisípiu liu-liu ba transporte públiku bus katak bainhira tula pasajeiru husi munisípiu sira mai tenke para no hatun de’it iha terminál no labele lori tama Díli laran, no bainhira kontra sirkular ne’e sei multa.
“Transpirte públiku husi parte leste mai Díli tenke para iha terminál Bekora, no parte rai klaran no norte nian tenke para iha Manleuana. Sira ne’ebé la kumpri ne’e kategoria kontra autoridade tránzitu sei prende sira ba selu multa,” nia informa.
Nia hatete, sirkular ne’e husi instituisaun governu nian atu implementa hodi bele garante no asegura lalaok jestaun kontra ordenasaun nian kona-ba infrasaun ka violasaun hasoru Kódigu Estrada nian no lejislasaun komplementár sira seluk.
“Nune’e bele fó oportunidade ba taxi sira iha Díli laran hodi hetan rendimentu, tanba bainhira pasajeiru mai tun iha terminal ba sira ne’ebé lori sasan barak otomatis sira sei utiliza taxi,” Xefe Seksaun Manutensaun Sinais Tránzitu iha DNTT Silva hatete.
Entretantu motorista Bus Diresaun Díli-Baucau, Tomé Mendonça dehan, kondisaun terminál Bekora la di’ak, tanba kloot liu no la sufisiente hodi halo parajen ba bus husi parte leste nian.
Nia hatete, terminál Bekora ne’e la’ós de’it bus mak para maibé mikrolet no taxi mós para hotu ida ne’e la sufsiente atu akumula.
“Husu DNTT atu bele kria kondisaun terminál ne’ebé di’ak no luan nune’e mós kompleta ho seguransa,” nia dehan.
Nia hatete, presiza mós fasilidade hanesan sintina, bee moos hodi fasilita pasajeiru no motorista sira hodi asesu ba.
“Durante ne’e ami pasajeiru no kondutór sira iha terminál Bekora bainhira atu ba haris-fatin tenke ba husu komunidade ne’ebé hela besik iha ne’ebá atu ami bele soe bee,” dehan nia.Enkuantu antes ne’e, DNTT planu ona atu muda terminál Bekora ba iha Hera, maibé to’o agora seidauk iha rezultadu pozitivu.
