Ano letivu primeiru Akademia Militár iha tinan 2026 sei simu de’it estudante hamutuk na’in 60, no númeru ida-ne’e bazeia ba kapasidade no tarjetu instituisaun nian.
Prezidente Komisaun Rekrutamentu Estudante Akademia Militár 2026, Nuno Corvelo, hateten katak kandidatu hamutuk na’in 320 husi munisípiu sira mak aplika ba vaga refere maibe husi númeru ne’e, kandidatu na’in 214 de’it mak selesiona ona no submete ba teste.
“Ano letivu primeiru Akademia Militár nian sei simu estudante hamutuk na’in 60, kompostu husi feto no mane. Sira ne’ebé mak hetan rezultadu di’ak liu iha teste sira mak liu. Laiha kuota espesífika ba feto ka mane,” nia hatete.
Nia dehan tan katak husi kandidatu na’in 214 ne’ebé tuir teste, feto hamutuk na’in 60 no restante mane, maibé, komisaun espera katak iha rezultadu final sei iha oportunidade hanesan ba kandidatu hotu.
“Ita-nia kandidatu sira-ne’e iha idade entre 17 to’o 20 anos to’o fulan Dezembru tinan ida-ne’e. Ami konsidera idade produtivu atu bele dezenvolve sira-nia kareira militár. Ba mane, altura labele menus husi metru 1,64 no ba feto labele menus husi metru 1,60,” dehan Prezidente Komisaun Rekrutamentu Corvelo.
Nia hatete katak dadaun ne’e kandidatu hamutuk na’in 214 mak tuir prova kulturál ho matéria hanesan Matematika, Portugés no Inglés no prova sira ne’e mak sei determina kandidatu sira ne’ebé bele kontinua ba etapa tuir mai.
“Agora dadaun kandidatu sira iha faze prova kulturál. Sira ne’ebé la pasa sei elimina no labele hakat ba etapa tuir mai. Kandidatu sira ne’ebé pasa sei tuir teste médiku no fíziku antes tama ba Akademia Militár iha Aileu,” nia informa.
Tuir nia, kandidatu balun la konsegue pasa iha faze dahuluk tanba idade liu ona ka la kompleta dokumentu komprovativu sira kona-ba habilitasaun académika, liuliu sertifikadu ensinu sekundáriu.
“Prosesu ida-ne’e rigorozu no laiha familiarizmu. Ami la haree kandidatu ida ne’e jenerál, ofisiál, veteranu nia oan ka lae. Komisaun kompromete atu hala’o prosesu selesaun ne’e ho transparénsia,” nia dehan.
Iha parte seluk, kandidata ba Akademia Militár Konjunta 2026, ho inisial DJA, hatete katak nia kontente tanba bele konkore ba vaga ida-ne’e no iha esperansa atu sai militár.
“Ha’u husi Munisípiu Aileu. Ha’u-nia esperansa mak atu tama Akademia Militár no sai militár hodi defende ita-nia rai. Sai militár mak ha’u-nia mehi desde ha’u ki’ik,” nia hatete.
Nune’e mós kandidatu inisial SNS hateten katak nia kontente bele partisipa iha prosesu rekrutamentu Akademia Militár Konjunta 2026.
“Ha’u-nia esperansa mak atu kontribui ba ita-nia rai. Manán ka lakon la’ós buat prinsipal, maibé motivasaun boot mak atu servisu ba nasaun,” nia afirma.Nia dehan katak sei simu kualquer rezultadu ho laran metin. Se pasa, ne’e sei sai parte husi nia vokasaun. Se la pasa, nia sei buka oportunidade seluk atu kontribui ba Timor-Leste.
