Prezidente Repúblika Jose Ramos Horta realsa katak eskola sira iha papél tomak atu valoriza no promove Língua Portuguesa iha sosiedade Timor-Leste nune’e mós iha paises husi Comunidade dos Paises da Língua Portuguesa (CPLP).
“Eskola iha papél tomak hodi promove no valoriza Língua Portuguesa ba estudante sira no estudante sira ba promove iha sosiedade,” Prezidente Repúblika Horta hatete.
Prezidente hateten eskola sira mak iha papél sentrál ba edukasaun nian iha valorizasaun no promosaun Língua Portuguesa.
“Governu tenke kria atividade sira ne’ebé envolve estudante, profesór no komunidade sira reflete Timor-Leste nia kompromisu metin ba edukasaun ida ne’ebé forma sidadaun konsiente, partisipativu ne’ebé iha ligasaun kle’an ho sira-nia identidade kulturál no linguístika,” nia informa.
Nia hatete, Língua Portuguesa hanesan espasu vibrante ida ba enkontru sira entre povu sira, kultura sira no jerasaun sira iha Timor-Leste no CPLP.
“Lian ida ne’ebé kontempla ema ko’alia liu millaun atus rua neen-nulu, la’ós de’it patrimóniu komún ida, ne’e mós kompromisu koletivu ida, Língua Portuguesa sai nafatin ligasaun ne’ebé halibur ita no forsa ne’ebé projeta ita ba mundu,” nia salienta.
Nia dehan, atu valoriza Língua Portuguesa no promove husi parte eskola no komunidade eskolár sira iha obrigasaun hodi transmite ba iha sosiedade iha Timor-Leste.
Iha fatin hanesan Ministra Ministériu Edukasaun (ME) Dulce de Jesus Soares dehan, Língua Portuguesa sai ona kultura ba iha Comunidade dos Pais da Língua Portuguesa (CPLP) nune’e mós iha Timor-Leste hanesan lian ofisial.
“Ministériu Edukasaun ita nafatin esforsu kria polítika oin-oin hodi implementa iha eskola sira nune’e estudante sira hotu bele hatene ko’alia Língua Portuguesa nune’e sira mós bele lori ba promove iha sosiedade,” nia dehan.
Nia hatete, Língua Portuguesa hanesan mós elementu estrutural ida ba identidade koletiva nune’e mós sai janela ida ne’ebé nakloke ba mundu, tanba ne’e eskola iha obrigasaun atu hatene no promove.
“Ita mós fiar katak durante ne’e ita-nia professór sira esforsu makaas hodi forma ita-nia estudante sira ho Língua Portuguesa no rezultadu hatudu katak iha vizita eskolár ne’ebé ita halo ita observa estudante barak mak komunika ho Língua Portuguesa ho di’ak,” nia salienta.Alende ne’e nia dehan, Timor-Leste, Língua Portuguesa representa instrumentu komunikasaun nune’e mós sai símbolu ba identidade nasional.
