Governu liuhusi Ministériu Transporte no Komunikasaun (MTK) no Minstériu Obras Públika (MOP) iha ona solusaun hodi pinta zebras croz sira ne’ebé lakon ona iha estrada públiku, nune’e mós ba estrada sira ne’ebé foin tau alkatraun iha kapítal Díli.
Ministru MTK Miguel Marques Gonçalves Manetelo dehan, kona-ba manutensaun zebra croz iha dalan públiku sira sei pinta foun no dalan sira ne’ebé foin tau alkatraun ne’e ministériu relevante iha ona komunikasaun atu bele rezolve tuir idak-idak nia tarjetu.
“Ita iha ona solusaun hodi pinta no halo manutensaun ba zebra croz iha Díli laran nune’e hodi fasilita komunidade atravesa ho seguru iha dalan públiku,” nia dehan.
Nia hatete, solusaun ne’ebé sira iha mak, zebra croz iha dalan sira ne’ebé la kona alargamentu estrada sei pinta fila fali nomós pinta iha dalan sira ne’ebé tau ona alkatraun, ba dalan sira ne’ebé tama iha alargamentu estrada sei la pinta.
“Ita asina ona kontratu ho kompañia rai-laran ida hodi pinta zebra croz, no dadaun ne’e hein hela dadus kona-ba área sira ne’ebé tama ba alargamentu estrada no la tama nune’e bele hahú pinta,” Ministru MTK Manetelo dehan iha Palácio do Governo, Díli.
Nia hatete, bainhira dadus hirak ne’e mai no entrega ba kompañia ne’ebé mak kaer obra nune’e bele aselera pinta zebra croz hirak ne’e.
“Ita rekoñese katak zebra cros hirak ne’ebé utiliza to’o ohin loron pinta iha tinan 2016 no seidauk halo manutensaun to’o ohin loron, tanba orsamentu la iha, maibé iha tinan ida-ne’e ita bele pinta fila fali,” nia salienta.
Entretantu estudante Feliz Paul Moniz dehan, zebra croz ne’e sinal ida ne’ebé fó espasu ba ema atu ultrapasa ho seguru iha estrada, tanba bainhira zebra croz laiha risku tebes ba ema nia vida.
“Ita haree kada loron motór, karreta sempre aumenta nia sirkulasaun iha dalan públiku, motorista balun halai la kontrolu hakfodak atu soke ona ema iha zebra croz, tanba tinta laiha,” nia dehan.
Nia dehan, iha kampus Faculdade de Ciências Sociais e Políticas (FCSP) nian zebra croz lakon total ida-ne’e risku tebes.
“Ami husu atu aselera lalais zebra croz,” estudante Moniz hatete.Alende ne’e nia mós husu atu tau atensaun ba zebra croz sira iha tikungang sira-ne’e, tanba kontribui mós ba dezastre.
