Governu liuhusi Ministériu Edukasaun (ME) no Ministériu Juventude no Desportu Arte no Kultura (MJDAK) atu re-ativa fali desportu eskolár kada eskola no sai hanesan baze ida hodi prepara estudante sira sai atleta iha futuru.
Diretór Eskola Sekundária Jerál, Fitun Naroman Timor Lorosa’e (FINANTIL), Aniceto Berlelo, dehan, desportu eskolár antes ne’e implementa ona iha eskola, maibé iha tinan 2020 mai to’o ohin loron desportu eskolár ne’e hapara tiha.
“Ita husu atu re-ativa fali atividade desportu eskolár kada eskola nune’e prepara estudante sira sai atleta ne’ebé di’ak hodi ba kompete iha mundu internásional,” nia dehan.
Nia dehan, desportu eskolár sai baze fundamentál, tanba ne’e ME, tenke loke fila fali no hamosu mós diresaun ida hodi foku ba desportu, liu-liu ba jogu eskolár.
“Nune’e kurríkulu ita implementa iha prosesu aprendizajen, bele la’o kedan ho prátika hanesan kompetisaun sira, ho ida-ne’e federasaun sira bele hetan atleta. Maibé se jogu eskolár la iha ita bele kria kompetisaun barak, maibé jogadór mak nafatin de’it,” Diretór FINANTL Berlelo dehan.
Nia informa, jogu eskolár iha mós eventu internasionál, hanesan jogu Asean Scholl nomós Olimpiade School.
Enkuantu nia dehan, ministériu rua-ne’e servisu hamutuk kria jogu ne’e tinan ida dala ida, hahú husi munisípiu to’o nasionál, hodi bele haree abilidade estudante nian.
Iha parte seluk Diretór Nasionál Desportu no Federadu iha MJDAK, Oscar Dias Quintas, dehan, kona-ba desportu eskolár tenke haree mós ba kurríkulu edukasaun.
“Ita bele buka hatene uluk desportu eskolár ne’e atu komesa husi ne’ebé ita lahatene, tanba la iha kurríkulu. Tanba kurríkulu importante, ita ko’alia edukasaun fizika no desportu tenke iha kurríkulu,” nia informa.
Nia dehan, MJDAK no ME iha servisu koordenassun oinsá atu haree ba desportu eskolár ne’e rasik, no ME sei prepara uluk profesór no formadór nune’e bele orienta estudante sira.
Entretantu Diretór Nasionál Ensinu Sekundáriu Jerál iha Ministériu Edukasaun, (ME) Benjamin Fernandes, hatete, ME iha materia ida edukasaun fizika desportu, maibé ministériu sei enfrenta difikuldade iha professór.
“Ita iha difikuldade kona-ba profesor iha área desportu nian, iha rekrutamentu hirak ne’e ami hetan na’in-tolu (3) de’it,” nia informa.Nia dehan, materia desportu ne’e iha kurríkulu iha, maibé profesór mak laiha no, maibé ministériu sei esforsu oinsa atu re-ativa fali atividade desportu eskolár hanesan tinan hirak liuba.
