Rede Feto Timor-Leste (RFTL) nia esperansa katak Segundu Komandante Jerál Natercia Eufrasia Martins iha nia mandatu bele rezolve problema diskriminasaun hasoru feto iha instituisaun Polísia Nasionál Timor-Leste (PNTL).
Prezidente RFTL Zelia Fernandes dehan, liga ba kazu alega diskriminasaun hasoru membru Polísia Julia Gama iha promosaun diviza foin lalais hatudu katak iha PNTL prátika injustisa no diskriminasaun liu-liu ba feto.
“Ita-nia esperansa ba Segundu Komandante Natercia Eufrasia Martins bele rezolve asuntu diskriminasaun ba feto polísia iha instituisaun PNTL nian,” nia dehan.
Nia hatete, alega diskriminasaun ne’e membru Polísia feto Julia Gama hasoru ne’e Rede Feto Timor-Leste lamenta tebes no lakohi atu akontese tan, ba membru sira seluk, tanba ida-ne’e violasaun ba ema-nia direitu.
“Ami sei hamrik iha ami-nia feto maluk nia sorin hodi halakon pártika injustisa no diskriminasaun iha instituisaun seguransa,” Prezidente Rede Feto Timor-Leste Fernandes hatete.
Nia hatete, husi RFTL nafatin solidariza maluk feto Julia Gama hodi hasoru situasaun ida-ne’e, tanba tuir lolos iha instituisaun PNTL labele hamosu diskriminasaun no injustisa.
Entretantu Segundu Komandante Jerál PNTL Komisária Natercia Eufrasia Martins dehan, estadu reprezenta povu liu-liu povu ne’ebé inseguru husi aktu saida de’it, povu nia konfiansa durante mandatu, sei la husik liu, no sei hadia lakuna sira iha instituisaun PNTL.
“Ha’u sei proteje feto hotu husi nasionál to’o baze nune’e mós iha instituisaun PNTL kona-ba hahalok injustisa no diskriminasaun,” nia informa.
Nia hatete liga ba kazu diskriminasaun ne’ebé mak virál iha média sosiál, dadaun ne’e sei iha prosesu nia laran hodi haree katak iha duni aktu diskriminasaun ka lae.
“Karik iha faktus ba diskriminasaun ita sei rezolve no garante katak iha instituisaun PNTL sei la akontese tan,” Komisária Eufrasia informa.Nia dehan, sei hamriik no luta hodi hasoru hahalok injustisa iha instituisaun PNTL no instituisaun sira seluk ne’ebé feto hasoru.
