Komunidade iha Suku Becora, iha kapital Díli, husu ba autoridade relevante sira atu komunika ho kampañia hodi rega rai rahun iha estrada públiku nune’e bele prevene moras, liuliu ba labarik sira tanba rai rahun makaas agora ne’e rezulta husi konstrusaun estrada nian halo ambiente foer no aumenta risku ba saúde públika.
Komunidade Suku Becora, Defin Oliveira hateten, sira enfrenta difikultade, tanba rai rahun makaas iha estrada ne’ebé karreta no motorizada halai ba mai no labarik sira halimar iha fatin ne’e, ho sintoma moras hanesan mear no inus metin.
“Rai loron di’ak, maibé kalan toba la di’ak, tanba mear inus makaas. Ami ba konsulta iha ospital, maioria moras mak rai-rahun ne’e nia konsekuénsia. Ami la hakarak moras, ami husu atu rega rai rahun loron ida dala tolu,” hateten komunidade Oliveira iha Sentru Saúde Becora, Díli.
Nia hatutan, rai rahun ne’e mai husi kompañia konstrusaun ne’ebé la rega no la limpa rai-rahun sira depois halo obra.
“Ami faan modo iha ne’e mos labele, tanba la’o deit minutu ida rua, modo sira foer fali ona. Ami presiza fase fali modo hotu bainhira loron hotu,” nia dehan.
Nia akresenta, katak komunidade apresia se iha kooperasaun entre autoridade lokal, kompanhia ne’ebé halo obra, no sidadaun sira atu rega rai rahun.
“Imi sempre dehan ami tenke kuidadu saúde. Entaun ne’e saúde mak ami presiza, imi tenke ajuda hodi rega rai rahun. Se imi lakohi ajuda, entaun problema saúde bele kontinua deit. Ha’u-nia oan sira moras hotu. Sira halimar iha loron, maibé kalan la toba, tanba mear inus makas,” nia esplika.
Komunidade husu governu lokal no kompañia konstrusaun atu halo rezponsabilidade ba impaktu sira ne’ebé lori ba saúde publiku, no fó prioridade ba medida simples hanesan rega estrada ho be’e hodi preven rai rahun.
Iha fatin hanesan, Xefe Sentru Saúde Becora Josue da Costa Ximenes hateten, loos duni katak rai rahun ne’e fo duni impaktu ba moras, tanba kompañia ne’ebé halo estrada la rega rai rahun, entaun bele afeta ba saúde komunidade nian.“Iha Sentru Saúde Becora ne’e moras ne’ebé mosu barak liu, iha fulan Agostu ne’e mak ISPA, tanba bain loron ne’e moras ida-ne’e tenke mosu, akompaña tan ho rai rahun husi konstrusaun estrada ne’e moras aumenta barak liu tan de’it, tanba iha fulan ida nia laran rejista hamutuk pasiente hamutuk 1582 mak mai halo ona tratamentu iha ne’e,” nia dehan.
